काठमाडौँ । रोयल च्यालेन्जर्स बैंगलोरले आईपीएल २०२४ मा लगातार पाँचौं जित हासिल गरेको छ । टोलीले चालू सिजनको ६२औं खेलमा दिल्ली क्यापिटल्सलाई ४७ रनले पराजित गरेको हो ।
यो जितसँगै आरसीबीले प्लेअफमा पुग्ने आशा जीवित राखेको छ । टोली १२ अंकसहित पाँचौं स्थानमा छ । योसँगै दिल्ली छैटौं नम्बरमा पुगेको छ ।
एम चिन्नास्वामी स्टेडियममा भएको खेलमा दिल्लीले टस जितेर बलिङ रोजेको थियो । बैंगलोरले घरेलु मैदानमा निर्धारित २० ओभरमा ९ विकेट गुमाएर १८७ रन बनाएको थियो । जवाफमा दिल्ली १९.१ ओभरमा १४० रनमा अलआउट भयो । खेलको प्लेयर अफ द म्याच क्यामरुन ग्रीन भए । उनले ३२ रनको अविजित इनिङ खेले । एक विकेट पनि लिए ।
आरसीबीका लागि रजत पाटीदारले ३२ बलमा ५२ रनको अर्धशतक बनाए भने विल ज्याकले ४१ रन बनाए । विराट कोहलीले २७ रन बनाए । क्यामरन ग्रीनले ३२ रनको अविजित इनिङ्स खेले । दिल्लीका खलिल अहमद र रसिख सलामले २–२ विकेट लिए । इशान्त शर्मा, मुकेश कुमार र कुलदीप यादवले एक–एक विकेट लिए ।
डिसीका कप्तान अक्षर पटेलले ५७ रनको इनिङ खेले । साई होप २९ रन बनाएर आउट भए भने ज्याक फ्रेजर–मगार्क २१ रन बनाएर आउट भए । आरसीबीका यश दयालले ३ तथा लोकी फर्गुसनले २ विकेट लिए । सपनिल सिंह, मोहम्मद सिराज र क्यामरुन ग्रीनले एक–एक विकेट लिए । २ ब्याट्सम्यान रनआउट भए ।
आजको खेलः गुजरात टाइटन्स भर्सेस कोलकाता नाइट राइडर्स – साँझ ७ः४५ बजे
