काठमाडौं । प्रमुख प्रतिपक्षी दल नेपाली कांग्रेस र सत्ता गठबन्धन दलबीचको किचलोका कारण चैत २ गतेदेखि प्रतिनिधिसभाको बैठक प्रभावित छ । आज बस्ने भनिएको बैठक पनि अनिश्चित छ ।
नेपाली कांग्रेस सत्ताबाट बाहिरिनुपर्दाको छटपटीका कारण उपप्रधान तथा गृहमन्त्री रवि लामिछानेमाथि आक्रामक बनिरहेको छ । फागुन २३ गते लामिछाने गृहमन्त्री बनेदेखि नै कांग्रेस आक्रामक बन्दै आएको हो । कांग्रेसलाई आफ्नै नेताहरुमाथि छानबिन हुने र कर्तुतहरु बाहिर आउने डरका कारण गृहमन्त्रीको आलोचना गरेको आरोप लाग्ने गरेको छ ।
तर नेपाली कांग्रसले गृहमन्त्री लामिछाने सहकारी ठगी प्रकरणमा संलग्न रहेको आरोप लगाउँदै आएको छ । उसले गृहमन्त्रीमाथि छानबिन गर्न संसदीय समिति गठन गर्नुपर्ने माग गरेको छ ।
लामिछाने राजनीतिमा प्रवेश गर्नुअघि काम गरेको गोर्खा मिडिया नेटवर्कअन्तर्गतको ग्यालेक्सी टीभीले सहकारीको पैसा अपचलन गरेको र त्यसमा रवि लामिछाने पनि जोडिएको भन्दै त्यसबारेमा अनुसन्धान गर्न संसदीय समितिको माग गर्दै प्रतिनिधिसभामा अवरोध गर्दै आएको हो । लामिछाने गृहमन्त्री भएको दोस्रो दिनदेखि नै कांग्रेसले सहकारी प्रकरणमा उनी दोषी रहेको र छानबिन गर्नुपर्ने माग अघि सार्दै आएको छ ।
कांग्रेसकै कारण संसद् बन्धक बनेपछि सभामुख देवराज घिमिरेले सहमतिका लागि केही दिनयता लगातार प्रयास गरिरहेका छन् । उनले प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछानेसँग छलफल गरिसकेका छन् । तर कांग्रेस टसमस भएको छैन ।
गृहमन्त्री लामिछानेले आफूमाथिका आरोपबारे संसद्कै रोष्ट्रमबाट जवाफ दिन चाहिरहेका छन् । तर कांग्रेसले लामिछानेलाई बोल्न दिएको छैन । कांग्रेस लामिछानेसँग निकै नै आक्रमण भएपछि संसदमा जनताका आवाज सुनाउन बन्द भएको छ । जनताका कुनै पनि कुरा नै उठ्न छाडेका छन । कानुन निर्माणको काम ठप्प भएको छ भने विकासका काम अलपत्र परेका छन् ।
अबरुद्ध संसदलाई नियमित गर्न आज पनि केही प्रयास हुने भएको छ । तर सहमति नजुटेको अवस्थामा आज प्रतिनिधि सभा बैठक पनि बेकामे हुने निश्चित जस्तै छ ।
