काठमाडौं । १५ बैशाखमा हुनलागेको उपनिर्वाचनमा नेकपा माओवादी केन्द्रले इलाम–२ मा एमालेका उम्मेदवार सुहाङ नेम्वाङलाई सघाउने भएको छ ।
उपनिर्वाचनको लागि माओवादीले धीरेन्द्र शर्मा ‘रमण’ को एकल नाम सिफारिस गरेपनि शीर्ष तहमा एमालेलाई सहयोग गर्ने सहमति बनेको हो ।
धीरेन्द्रले एमालेलाई सहयोग गर्ने निर्णय पार्टी केन्द्रमा भएको जानकारी दिए । उनले भने, ‘दुई अध्यक्ष विच हिजो सहमति भएअनुसार केन्द्रबाट निर्देशन आएको छ । अब हाम्रो उम्मेदवार सुहाङ हो । गठबन्धन भएका हिसाबले हामी उहाँलाई जिताउन लाग्नेछौं ।’
इलाम–२ मा एमालेबाट सुहाङ, राष्ट्रिय स्वतन्त्र पार्टीबाट मिलन लिम्बु, राष्ट्रिय प्रजातन्त्र पार्टीबाट लक्ष्मी गुरुङ उठ्ने भएका छन् । यस्तै, एकीकृत समाजवादीले जीतबहादुर राई, जनमतबाट प्रेमदीप थाम्सुहाङ, पहिचानवादीबाट डगेन्द्रसिंह थेगिम उम्मेवार बनेका छन् । नेपाली कांग्रेसले भने हाल उम्मेदवारको टुङ्गो लगाएको छैन ।
