काठमाडौँ । नेपालले ट्वान्टी–२० शृङ्खलाको उपाधि जितेको छ । दोस्रो खेलमा आयरल्याण्ड वल्भ्सलाई ७१ रनले हराउँदै नेपालले सिरिजमाथि कब्जा गरेको हो ।
नेपालले दिएको १९९ रनको लक्ष्य पछ्याएको आयरल्याण्ड वल्भ्स १८.३ ओभरमा अलआउट हुँदै १२७ रनमात्रै बनाउन सक्यो ।
स्टेफेन डोहेनीले २६, मोर्गान टोपिङले २१, केड कारमाइकलले १८, रोस अडाइर र निल रकले १७–१७, ग्यारेथ डिलानीले १५ रन जोड्दा अन्य ब्याट्सम्यानले दोहोरो अंकमा रन जोड्न सकेनन् ।
आयरल्याण्ड वल्भ्सलाई सस्तैमा समेट्न कुशल मल्ल र सोमपाल कामीले ३–३ विकेट लिए भने करण केसी, कुशल भुर्तेल, विवेक यादवले १–१ सफलता हात पारे ।
त्यसअघि टस जितेर पहिले ब्याटिङ थालेको नेपालले २० ओभरमा ७ विकेट गुमाएर १९८ रन जोड्यो ।
नेपालका लागि गुलशन झाले ४६, कुशल मल्लले ३४, रोहित पौडेलले ३३, कुशल भुर्तेलले २५, सन्दीप जोराले २१, अनिल शाहले १२ र आसिफ शेखले ११ रन जोडे ।
बलिङतर्फ आयरल्याण्ड वल्भ्सका म्याथ्यु फोस्टरले ३ बेन ह्वाइटले २ विकेट लिए भने गाभिन होए र फिओन हाण्डले १–१ विकेट लिए ।
हिजो भएको यस शृङ्खलाको पहिलो खेलमा नेपालले छ विकेटले जित निकालेको थियो । नेपालले टी–२० विश्वकपको तयारीस्वरुप यस सिरिज खेलेको हो ।
