काठमाडौं: प्रधानमन्त्री पुष्पकमल दाहाल प्रचण्डसँग भेटघाट गर्न नेकपा एमालेका अध्यक्ष केपी शर्मा ओली र राष्ट्रिय स्वतन्त्र पार्टीका अध्यक्ष रबि लामिछाने बालुवाटार पुगेका छन् ।
सत्तारुढ दलबीच खटपट भएका समाचार र नेताहरुका भनाई सार्वजनिक भइरहेको अवस्थामा तीनै नेताबीच भेटघाट बाक्लिएको छ ।
आइतबार बिहानमात्रै प्रधानमन्त्री पुष्पकमल दाहालसँग एक्लाएक्लै भेटवार्ता गरेका ओली आज साँझ महासचिव शंकर पोखरेललाई लिएर बालुवाटर पुगेका हुन् । त्यस्तै माओवादीबाट वर्षमान पुन सहभागी रहेको बालुवाटार स्रोतले जनाएको छ ।
खासगरी राष्ट्रिय सभाको अध्यक्षमा माओवादी केन्द्रले उम्मेदवारी दिने निर्णय गरेपछि सत्तारुढ दल नेपाली काँग्रेस र माओवादी केन्द्रबीच तिक्तता बढेको छ ।
यसबीचमा एमाले अध्यक्ष ओली र प्रधानमन्त्री प्रचण्डबीच भेटघाट बाक्लिएको छ । कतिपयले आजकै बैठकबाट गठबन्धनमा नयाँ तरंग आउने अनुमान गरेका छन् । सत्य निरूपण तथा मिलमिलाप विधेयक टुङ्ग्याउनुपर्ने दबाबमा रहेका प्रधानमन्त्री प्रचण्डले एमालेको साथ लिन कुनै राजनीतिक साैदावाजी गर्न लागेको अनुमान पनि गरिएको छ ।
यसैबीच, नेपाली कांग्रेसका तर्फबाट सरकारमा सहभागी मन्त्रीहरु पनि पार्टी सभापति शेरबहादुर देउवा निवासमा भेला भएका छन् । परराष्ट् मन्त्री एनपी साउदको फिनल्यान्ड भ्रमण पनि रद्द भएको छ ।
