मिलान । सोमबार इटालीको सिरी ‘ए’ मा पुछारको क्रोटोनलाई युभेन्टसले ३–० ले हराएको छ । क्रिस्टियानो रोनाल्डोले हेडबाट गरेको दुई गोलमा युभेन्टसले जित निकालेको हो । जितपछि युभेन्टसले शीर्ष स्थानको इन्टर मिलानसँगको दूरी आठ अंकमा कायम राख्यो ।
यस्तै टिम अंकतालिकाको तेस्रो स्थानमा पनि उक्लिन सफल भएको छ । युभेन्टसका लागि तेस्रो गोल वेस्टन म्याककेनीले गरे । रोनाल्डो यो सिजन लिगमा सर्वाधिक गोल गर्ने खेलाडी सूचीको शीर्षमा पनि पुगेका छन् ।
उनले १८ गोल गरेका छन् । यससँगै उनले इन्टरका रोमेलु लुकाकुलाई उछिनेका छन् । इन्टर ५३ अंकसहित शीर्ष स्थानमा छ । युभेन्टसको ४५ अंक भएको छ । क्रोटोन १२ अंकसाथ अन्तिम स्थानमा छ ।
