काठमाडौं । सत्तारुढ नेपाली कांग्रेसको महासमिति बैठक आजदेखि ललितपुरको गोदावरीमा बस्दैछ । सभापति शेरबहादुर देउवाले दिउँसो १ बजे बैठकको उद्घाटन गर्ने कार्यक्रम छ ।
‘ज्ञराजनीतिक स्थायित्व, रुपान्तरण र नवीनता । स्वतन्त्रता, न्याय र समानता नेपाली कांग्रेसको नीतिगत प्रतिबद्धता’ भन्ने मूल नारासहित कांग्रेसले महासमिति बैठक गर्न लागेको हो ।
बैठकमा पाँच वटा प्रतिवेदन पेश हुँदैछ । उपसभापति पूर्णबहादुर खड्काले नीति, महामन्त्री गगन थापाले सांगठनिक, अर्का महामन्त्री विश्वप्रकाश शर्माले समसामयकि, प्रवक्ता प्रकाशशरण महतले आर्थिक र लेखा समितिका संयोजक श्याम घिमिरेले लेखा परीक्षण प्रतिवेदन प्रस्तुत गर्नेछन् ।
बैठकमा करिब २ हजार ५ सय सहभागी हुने छन् । महासमितिमा सहभागी हुने प्रत्येकसँग ३ हजार रुपैयाँ शुल्क लिइने छ । बैठकमा करिब दुई करोड रुपैयाँ खर्च हुने अनुमान छ ।
महासमिति बैठकमा सहभागी हुनेले आवासको व्यवस्था आफैंले गर्नुपर्ने छ । उद्घाटन र समापन हुने दिनको नास्ता र खानाको व्यवस्था पनि सहभागी आफैंले गर्नुपर्ने छ । अन्य दिनमा भने बिहानको नास्ता र खाना पार्टीले खुवाउने छ ।
