काठमाडौं । नेपाली कांग्रेसको महासमिति बैठकमा हिन्दू राष्ट्रको विषय पनि एउटा एजेण्डा बन्ने भएको छ ।
पार्टीका केही नेताहरुले यस विषयमा छलफल गर्न दबाब दिएका मात्र होइनन् कि यसलाई मूल एजेण्डा नै बनाएर आवश्यक निर्णय लिन पनि भनेका छन् । सो पार्टीका केही नेताहरुले ७ फागुनमा ललितपुरको गोदावरीमा सुरु हुने पार्टीको महासमिति बैठकमा एजेण्डाका रुपमा छलफल गर्ने भन्दै सो विषयलाई पनि टिपाएका छन् ।
काँग्रेसको एक पक्ष यो संविधान जारी भए देखि नै नेपालमा हिन्दू राष्ट्रको पक्षमा नै रहँदै आएका छन् । उनीहरुले पार्टीको नेतृत्वलाई समय समयमा नेपाल हिन्दू राष्ट्र घोषणा हुनुपर्ने र त्यसका लागि पार्टीले नै आधिकारिक रुपमा निर्णय गर्नुपर्ने बताउँदै आएका थिए ।
केही नेताहरुले सनातन हिन्दुराष्ट्र नेपाल स्थापना महाअभियानको पनि घोषणा गरेका छन् । उनीहरुले पार्टीको महासमिति बैठकमा हिन्दुराष्ट्रको एजेण्डा प्रवेश गराउने मात्र नभएर यसलाई छलफल गरी त्यसमा निर्णय गर्नेसम्मको तयारी गरेका बुझिएको छ । यसको संयोजन पछिल्लो समयमा आएर केन्द्रीय सदस्य शंकर भण्डारीले गरेका छन् । उनले आफूहरुको अभियानलाई पार्टी सभापति शेरबहादुर देउवाले पनि सकारात्मक रुपमा हेरेको बताएका छन् ।
केही समय अघि पार्टीका नेता शशांक कोइरालाले हिन्दू राष्टका पक्षमा काँग्रेस जानुपर्ने बताएका थिए तर पार्टी सभापति शेरबहादुर देउवाले भने यस विषयको आधिकारिक धारणा सार्वजनिक रुपमा राखेका छैनन् । पार्टीको महासमिति बैठकमा हिन्दुराष्ट्रको विषय एजेण्डाको रुपमा आत्मसाथ गरेर अन्य राजनीतिक दल र आम समुदायसँग छलफल अगाडि बढाउने तयारीमा सो अभियानका अभियन्ताहरु छन् । उनीहरुले सो अभियानका लागि महासमिति बैठकमा धर्ना दिनेसम्मको पनि कार्यक्रम रहेको अभियानका सदस्यहरुले बताएका छन् ।
हामीले महासमिति बैठकका समयमा हलबाहिर ब्यानरसहित धर्ना दिने काम पनि गर्नेछौँ ती सदस्यले भने । कांग्रेसले हिन्दुराष्ट्रलाई एजेण्डाको रुपमा स्वीकार गरेपछि अरु दल र सरकारलाई भन्न सकिने र संविधान संशोधनसम्म जान सकिने धारणा उनीहरुको छ ।
पछिल्लो समयमा नेपालमा राजा फर्किने, त्यसअघि हिन्दू राष्ट्र कायम गरिने र त्यो भन्दा पनि अघि यी विषयवस्तुहरु राखेर संविधान संशोधनका लागि एक मस्यौदा समिति नै गठन गरिने भन्ने सम्मका समाचारहरु आइरहेका छन् । सोही बमोजिम पूर्व राजा ज्ञानेन्द्रको सक्रियता पनि पहिलेको तुलनामा बढ्दो छ । उनले पनि अब देश बिग्रिसकेकाले चुप लागेर बस्न नसकिने जस्ता अभिव्यक्ति दिँदै सार्वजनिक रुपमा भाषण नै गर्ने गरेका छन् ।
उता भारतमा पनि हालै अयोध्यामा स्थापना गरिएको श्रीरामको मन्दिरका क्रममा प्रधानमन्त्री नरेन्द्र मोदीले हिन्दू अतिवादको उदाहरण प्रस्तुत नै गरेका छन् । उनको पार्टी भारतीय जनता पार्टीले त हिन्दू धर्मको वकालत गर्ने नै भयो । अब भारतमा आउनै लागेको निर्वाचनमा पनि उनको यो एजेण्डा छ नै । यसैक्रममा उनले नेपालमा पनि हिन्दू राष्ट्रका बारेमा लबिङ गर्न सक्ने आँकलन नेपालमा पनि बढ्दो छ ।
यस्तो बेलामा यता नेपालमा पनि यो अभियान सुरु हुनु संयोगमात्र नहुन सक्छ । त्यसैमा पनि वर्तमान सत्ताको सबैभन्दा ठूलो पार्टी नेपाली काँग्रेसले महाधिवेशनपछिको सबैभन्दा ठूलो यो महासमिति बैठकमा नै यो एजेण्डा छिराएर वैधानिकता प्रदान गराउने प्रयास गर्नुलाई पनि सामान्य रुपमा लिन सकिँदैन ।
