एजेन्सी । भारतमा संसदमा भएको आतंकवादी हमलाको २२ औँ वर्षगाँठमा आगन्तुक ग्यालरीबाट अचानक दुई युवाले हाम फालेपछि सदनमा हंगामा मच्चिएको छ ।
त्यतिबेला भाजपा सांसद खगेन मुर्मुले लोकसभामा आफ्नो धारणा राख्दै थिए । उनीहरु सदनको बेन्चमा उफ्रन थाले । युवाले जुत्तामा स्प्रे लुकाएका थिए । बाहिर निकालेर स्प्रे गरे, जसका कारण संसदभित्र पहेँलो धुवाँ फैलिन थाल्यो ।
पुरै सदनमा अशान्तिको माहौल थियो । त्यसपछि सांसदहरुले उनलाई समातेका थिए । कांग्रेस सांसद गुरजित सिंह औजलाले भने, ‘मैले पहिले समातें । कतिपयले दुवैलाई कुटपिट समेत गरेका छन् ।’ त्यसपछि उनलाई सुरक्षाकर्मीको जिम्मा लगाइएको थियो । यो देखेर सभामुखले संसदको बैठक दिउँसो सवा २ बजेसम्मका लागि स्थगित गरेका थिए ।
यसअघि सन् २००१ डिसेम्बर १३ मा पुरानो संसद भवनमा ५ आतङ्ककारीले आक्रमण गरेका थिए । जसमा दिल्लीका ५ प्रहरीसहित ९ जनाको मृत्यु भएको थियो ।
कारबाहीका क्रममा प्रवेश गर्ने दुई मध्ये एकको नाम सागर रहेको बताइएको छ । दुवै सांसद आगन्तुक पास लिएर सदनमा आएका थिए । त्यही समयमा एक पुरुष र एक महिलाले सनदबाहिर पहेंलो धुवाँ छोडे । उनीहरुको नाम अमोल र नीलम रहेको भारतीय सञ्चारमाध्यमले जनाएको छ । उनीहरुको साथबाट कुनै फोन वा झोला बरामद भएको छैन । बाहिरबाट पक्राउ परेका दुवैजना आफैं संसदमा पुगेको र कुनै पनि संगठनमा आबद्ध नभएको दाबी गरेका छन् ।
‘तानाशाही चल्दैन । संविधान बचाओ । मणिपुरलाई न्याय देउ । महिलामाथि हुने यातना जारी रहने छैन । भारत माता अमर हो । जय भीम, जय भारत ।’ निलमले नारा लगाइन् ।
यो घटना दिउँसो सवा १ बजेको हो । त्यसपछि दिउँसो २ बजे संसदको बैठक पुनः सुरु भएको थियो । लोकसभा अध्यक्ष ओम बिरलाले भने – ‘भर्खरै भएको घटना सबैको चिन्ताको विषय हो । यसको अनुसन्धान जारी छ । दिल्ली प्रहरीलाई पनि अनुसन्धान गर्न निर्देशन दिइएको छ । प्रारम्भिक अनुसन्धानमा यो सामान्य धुवाँ थियो । विस्तृत अनुसन्धानको नतिजाको बारेमा सबैलाई जानकारी दिइनेछ ।’
