काठमाडौं । नेकपा एमालेमा पार्टी अध्यक्ष तथा संसदीय दलका नेता केपी शर्मा ओलीले सांसद पदबाट कारवाही गर्नेगरी थालेको प्रक्रिया रोक्न माग गर्दै सर्वोच्च अदालतमा रिट लिएर गएका माधव पक्षको रिट आज दर्ता नहुने भएको छ ।
एमालेले संविधानको धारा ८९, राजनीतिक दल सम्बन्धी ऐनको दफा ३१ र ३२ र पार्टीको विधानको धारा ४९ लाई समेत उदृत गरेर सांसद पदबाट किन कारवाही नगर्ने भन्ने प्रश्नसहितको स्पष्टीकरण सोधेपछि नेपाल पक्ष अदालत गएको थियो ।
नेपालपक्षका वकिलहरू सर्वोच्च अदालत पुगे पनि अदालत प्रशासनले समय नभ्याउने र अध्ययनका लागि थप समय लाग्ने भन्दै बुधवार रिट दर्ता नगरेको हो ।
रिट निवेदनमा वैशाख १० गते नै एमालेको अर्को बैठक राखिएकोले सो बैठकबाट थप कारवाही गरिने र त्यहि आधारमा निर्वाचन आयोगले समेत विवरण सच्याउने भएकाले रिट निवेदनको किनारा नलागेसम्म सबै कारवाही यथास्थितिमा राख्न अन्तरिम आदेश माग गरिएको छ ।
राजनीतिक दल सम्बन्धी ऐन र संविधानको धारा ८९ बमोजिम पार्टीले कारवाही गरेमा सांसद पद गुम्ने भएकाले माधव नेपाल पक्ष अदालत पुगेका हुन् ।
