काठमाडौँ । प्रधानसेनापति प्रभुराम शर्माले नेपाली सेनाका उपरथी बाबुराम श्रेष्ठको लेखन रहेको ‘राष्ट्रिय एकताको प्रतीक वीर नेपाली सेना’ बोलको गीत तथा भिडियो सार्वजनिक गर्नुभएको छ ।

मंगलबार सेनाको हेडक्वार्टर जंङ्गी अड्डामा आयोजित एक कार्यक्रममा उहाँले उक्त गीत तथा भिडियो सार्वजनिक गर्नुभएको हो ।

त्यसैगरी गीतको छायाङ्कन जीतबहादुर थापा र निरज पुडासैनीले तथा सम्पादन प्रकाश हुमागाई, किशोर दंगाल र रमेश विष्टले गर्नुभएको छ ।

युवा संगीतकार राजेन्द्र बजगाइले संगीत रहेको उक्त गीतमा नेपाली सेनाले विगतमा गरेका क्रियाकलाप र योगदानको चर्चा गरिएको छ । गायिका गीता पाण्डे, गायक सुभाष तिम्सिनाको युगल स्वर रहेको गीतमा कोरस गायन नारायण थापा, रवीन्द्र लामिछाने, राज कुमार आले मगर, राजीव परियार हेमन्त रामजेली मगरको छ । गीतको संगीत संयोजना दिनेश सुनामले गरेका छन् ।

विशेष पौड्यालले निर्देशन गरेको भिडियोमा नेपाली सेनाद्वारा गरिएको विभिन्न साहसिक, मानवताका कार्यहरूको भिडियो फुटेज राखिएको छ । सो अवसरमा गीतकार श्रेष्ठले नेपाली सेनाले स्थापना कालदेखिनै देशको सेवामा दिएको योगदानको चर्चा गर्न मन लागेकोले गीत लेखेको बताउनुभयो ।

“देशको संविधानले दिएको विभिन्न जिम्मेवारी बहन गर्न नेपाली सेनाले आजसम्म कुनै कसर बाँकी राखेको छैन”, उहाँले भन्नुभयो, “नेपाली सेनाका कर्तव्यपरायण कर्मठ सैनिकहरु तथा हाम्रा पुर्खाहरूको योगदान र बलिदानका बारेमा सबै नेपाली नागरिकको बुझाइमा एकरूपता पाइँदैन । म एक सैनिक भएको हिसाबले सधैँ यो विषयले घचघच्याई रह्यो ।”

अहिले सूचना र सञ्चारको युग भएकाले नेपाली सेनाको योगदानलाई शब्दमार्फत गीतमा ल्याउन प्रेरणा मिलेको उहाँको भनाइ थियो ।

https://www.youtube.com/watch?v=gNK1EUu9ZY4