बैंङ्कक । थाइल्यान्डका प्रधानमन्त्री प्रयुथ चान–ओचा मास्क नलगाएपछि जरिवानामा परेका छन् । अन्तर्राष्ट्रिय सञ्चारमाध्यमको अनुसार कोभिड–१९ विरुद्धको खोप कार्यक्रमका विषयमा भएको बैठकमा मास्क नलगाई उपस्थित भएपछि प्रयुथलाई १९० अमेरिकी डलर जरिवाना गरिएको हो ।
प्रधानमन्त्री कार्यालयको आधिकारिक फेसबुक पेजमा राखिएको तस्बिरबाट उनले बैठकमा मास्क नलगाएको स्पष्ट भएको हो । थाइल्यान्डमा कोरोनाभाइरस संक्रमण दर बढिरहँदा अधिकारीहरुले सार्वजनिकस्थलमा मास्क नलगाउनेमाथि ६४० डलरसम्म जरिवाना गर्ने नियम बनाएका छन् । आफ्नो कार्यकालमा पहिलोपटक प्रयुथले नियम उल्लंघन गरेकाले उनलाई कम जरिवाना गरिएको जनाइएको छ ।
सोमबार थाइल्यान्डमा दुई हजार ४८ जनामा कोरोना संक्रमण हुँदा आठजनाको मृत्यु भएको यहाँको स्वास्थ्य मन्त्रालयले जनाएको छ । संक्रमण बढेसँगै यहाँ अस्पतालमा शय्या र सघन उपचारकक्षको अभाव भएको जनाइएको छ ।
