विराटनगर । कोशी प्रदेश सरकारमा आज थप चार मन्त्री नियुक्त भएका छन् । प्रदेशका मुख्यमन्त्री हिक्मतकुमार कार्कीले सोमबार चार मन्त्री थपी मन्त्रिपरिषद् विस्तार गरेका हुन् ।
योसँगै, मुख्यमन्त्री, पाँच मन्त्री र तीन जना राज्यमन्त्री गरी कोशी प्रदेशको मन्त्रीमण्डल ९ सदस्यीय बनेको छ ।
मुख्यमन्त्री कार्कीले खानेपानी, सिँचाइ ऊर्जा मन्त्रीमा बुद्धिकुमार राजभण्डारी र आन्तरिक मामिला तथा कानुन मन्त्रीमा लिलाबल्लभ अधिकारीलाई नियुक्त गरेका छन् । उस्तै, उनले रामप्रसाद महतोलाई उद्योग, कृषि तथा सहकारी मन्त्रालयको राज्यमन्त्री र निरन राई आर्थिक मामिला तथा योजना मन्त्रालयको राज्यमन्त्रीमा नियुक्त गरेका छन् ।
कार्कीले मन्त्रीहरुको जिम्मेवारी समेत हेरफेर गरेका छन् । उनले मन्त्रीहरु तिलकुमार मेन्याङ्बो स्वास्थ्य, पाँचकर्ण राई पर्यटन, वन तथा वातावरण, एकराज कार्की भौतिक पूर्वाधार विकास मन्त्रालय र सिर्जना राईलाई सामाजिक विकास मन्त्रालय राज्यमन्त्रीको जिम्मेवारी दिएका छन् । यसअघि मेन्याङ्बो खानेपानी, सिँचाइ तथा उर्जामन्त्री रहेका थिए ।
संविधानको धारा १६८ (३) अनुसार कोशीमा ठूलो दलको हैसियतमा एमाले सरकारले आगामी यही असोज २० गतेसम्ममा विश्वासको मत लिइसक्नु पर्नेछ ।
