एजेन्सी । भारतले पाकिस्तानमाथि सबैभन्दा ठूलो जित हात पारेको छ । भारतले एकदिवसीय एसिया कपको सुपर–४ खेलमा पाकिस्तानलाई कीर्तिमानी २२८ रनले पराजित गरेको हो ।
यसअघि सन् २००८ मा मिरपुर मैदानमा भारतले पाकिस्तानलाई १४० रनले पराजित गरेको थियो ।
कोलम्बोको आर प्रेमदासा रंगशालामा टस हारेर पहिले ब्याटिङको निम्तो पाएको भारतले निर्धारित ५० ओभरमा दुई विकेट गुमाएर ३५६ रनको विशाल स्कोर बनाएको थियो । जवाफमा पाकिस्तान ३२ ओभरमा १२८ रन मात्र बनाएर धराशायी भयो ।
टस जितेर पाकिस्तानका कप्तान बाबर आजमले फिल्डिङ रोजेका थिए । कोलम्बोको पिचमा बाबरको निर्णय उनको विरुद्धमा गयो ।
वर्षाले प्रभावित यस खेलमा भारतका तर्फबाट रोहित शर्मा र शुभमन गिलले १२१ रनको ओपनिङ साझेदारी गरेर टिमका लागि बलियो आधार खडा गरेका थिए ।
दुवैले अर्धशतक पनि बनाए । तर उनीहरू दुवै छोटो अन्तरालमा आउट भएका थिए ।
यसपछि क्रिजमा आएका अनुभवी र आक्रामक ब्याट्सम्यानद्वय विराट कोहली र केएल राहुलले २ सय ३३ रनको साझेदारी गर्दै टोलीको स्कोर ३५६ मा पुर्याएका थिए । विराट र राहुलले शतक बनाए र अन्तसम्म आउट भएनन् ।
चोटका कारण पाकिस्तानी बलर ह्यारिस रउफले खेल्न सकेका थिएनन् भने निसम शाह पनि चोटग्रस्त भएपछि पाकिस्तानी बलिङ फितलो भएको थियो ।
३५७ रनको ठूलो लक्ष्य पछ्याएको पाकिस्तानले ४७ रनभित्रै ३ विकेट गुमाएको थियो । कप्तान बाबर र ओपनर इमाम उल हकले खास केही गर्न सकेनन् ।
इनिङ्सको १८औं ओभरमा बलिङ गर्न आएका कुलदीप यादवले बाँकी ब्याट्सम्यानलाई आफ्नो जालमा पारे । कुलदीपले २५ रन दिएर ५ विकेट लिए ।
पाकिस्तानले १२८ रन मात्र बनाउन सक्यो र खेल २२८ रनको कीर्तिमानी अन्तरले पराजित भयो ।
विराट कोहलीले ८४ बलमा शतक बनाएका थिए । उनले शाहिन अफ्रिदीको बलमा एक रन लिएर आफ्नो एकदिवसीय करियरको ४७ औं शतक बनाए । तीनवटै ढाँचामा उनको यो ७७ औं शतक थियो, उनले टेष्टमा २९ र टी–२० मा एक शतक बनाएका छन् ।
कोहलीले इनिङ्सको ९८ औं रन लिने बित्तिकै आफ्नो एकदिवसीय करियरको १३ हजार रन पनि पूरा गरे । उनी भारतका लागि १३ हजार रन बनाउने दोस्रो भारतीय बने । उनीभन्दा सचिन तेन्दुलकरले मात्र बढी रन बनाउन सकेका छन् । एकदिवसीय क्रिकेटमा सचिनको नाममा १८ हजार ४२६ रन छ ।
केएल राहुलले शतक प्रहार गरे । उनले साढे दुई वर्षपछि एकदिवसीय क्रिकेटमा आफ्नो ब्याटबाट शतक बनाए । राहुलले अन्तिम पटक २६ मार्च २०२१ मा इङ्ल्यान्डविरुद्ध १०८ रनको इनिङ खेलेका थिए ।
राहुलले पाकिस्तानविरुद्ध पहिलो पटक शतक प्रहार गरेका हुन् । उनले पाकिस्तान बाहेक इंग्ल्याण्ड, न्यूजिल्याण्ड, वेस्ट इन्डिज, श्रीलंका र जिम्बाब्वे विरुद्ध १–१ शतक प्रहार गरेका छन् ।
अंक तालिका
१. भारत – २ अंक
२. श्रीलंका – २ अंक
३. पाकिस्तान – २ अंक
४. बंगलादेश – ० अंक
आजको खेल
भारत र श्रीलंका
नेपाली समय: ३.१५ बजे
