देश महामारीमा छ । जनता आकुल व्याकुल छन् । दिनहुँ महामारीले ज्यान लिनेको संख्या बढ्दै जाँदा देश शोकमा डुबेको छ । जनतामा निराशा छाउने डर प्रतिदिन बढ्दैछ ।
नयाँ दिल्लीमा पानी पर्दा यता छाता ओढ्नेहरुले पनि त्यता महामारीले जनता मरिरहेको देख्दा यता तयारी केही गरेनन् । अघिल्लो वर्ष पनि त्यतैबाट आएको भाइरसले देशमा क्षति पुर्याएको सबैलाई थाहै थियो ।
अहिले नयाँ भेरिएन्ट आएपछि त्यो नेपाल छिर्ने पक्का पक्की नै थियो । तर भारतमा महामारीले बस्न नसकेपछि दिनहुँ नेपालका कैयौँ नाका भएर नेपाली जनता आफ्नो घर निस्फिक्री फर्किंदै थिए, कतै रोकतोक थिएन ।
आखिर त्यही संक्रमणले अहिले हामीलाई यता गाँजेको छ । प्रतिदिन हामी पनि भारतीय मोडलमा गइरहेका छौँ । त्यता अक्सिजन र अस्पतालका बेड नपाएका समाचार अब हाम्रा पनि भएका छन् । तर सरकारको तयारी केही छैन ।
यो त भयो तयारीको कुरा, जुन सरकारले गर्दैन पहिलेदेखिको चलन नै यही हो । हामीले भोगिआएको सरकार नै यस्तै हो ।
तर यहाँ अर्काे दुःखद पक्ष छ औषधि, स्वास्थ्य सामग्री तथा खोपमा कमिसनको । सुन्दा पनि लाजमर्दाे । मानौँ कि ती कमिसनखोरहरुलाई यो महामारीले नै छुँदैन कि जस्तो ।
यस्तो लाग्दैछ उनीहरु आफू मर्दा, आफ्नो परिवारका सदस्य मर्दा किन्ने कात्रोमा पनि कमिसन खान्छन् होला । यो हामीले गरेको दोषारोपण होइन, देशव्यापी रुपमा नेपाली जनताले आफ्ना सामाजिक सञ्जालहरुमा यही भनिरहेका छन् ।
अघिल्लो वर्ष पनि महामारीले च्यापेपछि नेपाली जनता घरघरमा लकडाउनमा थुनिएर बस्न थाले । त्यस समयमा त खोप आइ सकेको थिएन, हामीलाइ न्यूनतम स्वास्थ्य सामग्री र औषधि चाहिएको थियो ।
सरकारले खरिदको प्रक्रिया शुरु गर्यो । तर ओम्नी समूह, केके समूह निस्किए कमिसनको लागि । अनि सरकारले तिनै बिचौलियाको कमिसनबाटै सामग्री किन्यो नेपाली जनतालाई कम्तीमा पनि दश गुणा बढी पर्न गयो ।
त्यसबेला पनि निरीह नेपाली जनताले ती कमिसनखोर र तिनको पृष्ठपोषण गरेको भन्दै सरकारलाई पनि निकै सरापेका हुन् । तर बीसको उन्नाइस भएन । आखिर त्यही मूल्यमा चीनबाट सामग्री आयो, बाध्य भएर जनताले प्रयोग गर्नुपरो ।
अहिले फेरि ताल उही छ । अहिले बिचौलिया फेरि सल्बलाएका छन् खोपका किन्ने काममा कमिसनका लागि । जनता दिनहँ ज्यान गुमाउदै छन् । देशव्यापी महामारीले त्राही त्राही बनाउँदैछ । तर बिचौलिया, सरकार कमिसनको खेलमा चुर्लुम्म डुबेको छ ।
मान्छे मार्नेलाई मात्र होइन, यसलाई पनि भन्छन् मानवता विरुद्धको अपराध । हो, यही अपराध हुदैछ नेपालमा । जहिले जहिले कोरोनाले घेर्छ, त्यतिबेला कमिसनको चक्कर पनि सँगसँगै भित्रिन्छ । यो हामी सबैका लागि ठूलो अभिसाप हो ।
स्वास्थ्य तथा जनसंख्या मन्त्रालय र कोभिसिल्ड खोप उत्पादन गर्ने भारतको सिरम इन्स्टिच्युटको नेपाली एजेन्टबीच करिब ३५ करोड कमिसनमा कुरा नमिल्दा ५० लाख डोज खोप खरिद प्रक्रिया अघि नबढेको विवाद सतहमा आएको सुनिएको छ ।
खोप उत्पादन गर्ने कम्पनी सिरमसँग एजेन्टबिनै ५० लाख डोज भ्याक्सिन खरिद गर्न खोज्दा नेपाली एजेन्टले कमिसन माग गरेर प्रक्रिया नै अघि बढ्न नदिएको मन्त्रालयको दाबी छ ।
‘खोप खरिदमा बिचौलियाले १० प्रतिशत कमिसन लिन खोजे, बिचौलियाको सक्रियताका कारण २७ दिनसम्म अप्ठ्यारोमा परियो,’ स्वास्थ्य तथा जनसंख्यामन्त्री हृदयेश त्रिपाठीले भनेका छन् । उनी भन्छन् ‘यो २७ दिन यति निर्णायक भयो, यही बीचमा भारतमा ह्वात्तै संक्रमण बढ्न थाल्यो । त्यही कारण ५० लाख डोज खोप खरिद प्रक्रिया अगाडि बढ्न सकेन ।’
‘नेपाली जनतामाथि अन्याय गर्ने यस्ता बिचौलिया पनि देखियो, जसले गर्दा खोप ल्याउन सहज भएन,’ सञ्चारकर्मीसँग त्रिपाठीले भनेका थिए ।
कमिसनकै कारण खोप ल्याउन नदिन बिचौलियाहरू सफल भएको मन्त्रालयको बुझाइ छ । सिरमको नेपाली एजेन्ट हुकाम डिस्टिब्युटर्स एन्ड लजिस्टिक प्रालि हो । हुकाम विजय दुगड, अभिषेक दुगड, सुरज वैद्य र ऋतुसिंह वैद्यका नाममा छ । उनीहरूले खोप खरिद गर्दा १० प्रतिशत कमिसन मागेको मन्त्रालयको दाबी छ ।
पहिलो डोज खोप लिएका नेपाली जनता दोस्रो डोजको पर्खाइमा रहेका बेला देशको हालत यस्तो छ । अनि यसलाई मानवता विरुद्धको अपराध नभनेर के भन्ने ? त्यसैले यतिखेर सारा नेपालीले सोध्दैछन्– नेपालमा कोरोनासँगै कमिसन किन यसरी भित्रिन्छ ?
