काठमाडौं । निषेधाज्ञाको १० औ दिन आज सनिबार काठमाण्डौ उपत्यकाका तीनै जिल्लाहरुमा तुलनात्मक रुपमा कम सवारीसाधन सञ्चालनमा रहे ।
काठमाण्डौ उपत्यकाका तीन जिल्ला काठमाण्डौ, ललितपुर र भक्तपुरमा सनिबार अत्यावश्यक सेवाका , खाद्यान्न बोकेका, सरसफाई, स्वास्थ्य तथा सञ्चार क्षेत्रमा कार्यरतहरुका सवारी साधन देखिएका थिए । फाट्फुट् बिना सवारी पास सवारी लिएर सडकमा निस्केका सर्वसाधरणलाई प्रहरीले चेकजाँच गरि नियन्त्रणमा लिएको थियो ।
गत विहिबारदेखि निषेधाज्ञा उलंघन गर्नेहरुलाई प्रहरीले जरिवाना गर्न थालेपछि निषेधाज्ञाको पालना गर्ने क्रम बढेकाले पनि सडकमा अत्यावश्यक बाहेकका सवारी साधन कम भएका हुन् । साथै सनिबार भएकाले एक चौथाई कर्मचारीबाट सञ्चालन भएका सरकारी कार्यालय, वित्तिय कार्यलय लगायत कार्यालय बन्द भएका कारण पनि सडकहरु सुनसान देखिएको हो । बिना पास सवारी संञ्चालन गरेकाहरुमाथि गरिएको कारवाहीको संख्या पनि तुलनात्मक रुपमा आज सनिबार न्युन छन् ।
