काठमाडौं । नेपाली कांग्रेसको पदाधिकारी बैठक सुरु भएको छ । बैठक कांग्रेस सभापति शेर बहादुर देउवा निवास बुढानिलकण्ठमा बसिरहेको छ । प्रधानमन्त्री पद खाली नभइ राष्ट्रपतिले नयाँ सरकार गठनका लागि सीमित समय दिएर आह्वान गरेपछि प्रतिपक्ष दल काँग्रेस पदाधिकारी बैठक बसेको हो ।
हिजो (बिहिबार) साँझ राष्ट्रपति कार्यालयबाट नयाँ सरकार गठनका लागि सीमित समय दिएर आह्वान भएलगत्तै सभापति देउवाले कांग्रेसको आकस्मिक बैठक बोलाएका हुन् । यता प्रधानमन्त्रीले विश्वासको मत नलिईरराजीनामा नदिई संविधानको धारा ७६ (५) अनुसार नयाँ सरकारको आह्वान राष्ट्रपतिबाट भएको हो। त्यसैले संविधानअनुसार राष्ट्रपति अगाडि नबढेकोमा कांग्रेसले विरोध गरेको छ। त्यस्तै राष्ट्रपति संविधानअनुसार अगाडि नबढेकोले महाअभियोग लगाउनुपर्ने आवाज कांग्रेसभित्र उठेको छ। नयाँ सरकार बनाउन र राष्ट्रपतिविरूद्ध महाअभियोग लगाउन कांग्रेस नेता गगन थापाले माग गरेका छन्।
आजको बैठकले प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको निर्णयबारे आधिकारिक धारण बनाउनेछ । बैठकमा पदाधिकारी, पूर्व पदाधिकारी, संसदीय दलका अधिकारी र केहि प्रभावशाली नेताहरु पनि सहभागी छन् ।
