काठमाडौं । प्रधानमन्त्री केपी शर्मा ओलीले राष्ट्रपतिबाट संविधानमा आँच पुराउने काम नगरेको स्पष्ट पार्नुभएको छ । उहाँले संविधान अनुसार सरकारले गरेका सिफारिसलाई राष्ट्रपतिले मान्नुपर्ने भएकाले आफुले गरेको सिफारिसका आधारमा राष्ट्रपतिले प्रधानमन्त्रीका लागि आव्हान गर्नुभएको भन्दै राष्ट्रपतिको भूमिकाको बचाउ गर्नुभयो । उहाँले राष्ट्रपतिले संविधानमाथि थिचोमिचो गर्ने काम नभएको भन्दै राष्ट्रपतिको विरोध गर्नेहरु गणतन्त्र र गणतान्त्रिक व्यवस्था विरोधी भएको टिप्पणी गर्नुभयो ।
उहाँले भन्नुभयो “संविधानमाथि कस्ले थिचोमिचो गर्यो ? बैकल्पिक सरकार बनाउन छोड्दा पनि संविधानमाथि थिचोमिचो हुन्छ ? मार्गप्रसस्त गरिदिंदा पनि थिचोमिचो हुन्छ ? म लिन्न (विश्वासकोमत)मैले हात उठाएँँ । म हार्छु । विश्वासको मत लिएँ भने म हार्छु । हारेपछि ५ मै जाने हो । ५ मै जानेहो भने जाउँ न त तपाईहरु सरकार बनाउनुहोस् । नीति,कार्यक्रम सबै पेश गर्नु भन्ने कुरा संघीय लोकतान्त्रिक गणतन्त्र विरुद्ध हुन्छ ? लोकतन्त्र विरुद्ध हुन्छ ? संविधान विरुद्ध हुन्छ ? के यो आजको आवश्यकता विरुद्ध हुन्छ ? ”
आफुले भनेजस्तो नभएपछि सरकार विरोधीहरुले राष्ट्रपतिको हुर्मत लिने काम गरेको टिप्पणी उहाँले गर्नुभयो ।
उहाँले भन्नुभयो “कोही राष्ट्रपतिलाई महाअभियोग लगाउन पर्छ भनेको छ । राष्ट्रपतिलाई महाअभियोग लगाउने आक्रोश, कुष्ठा अथवा के हो यो ? संविधान अनुसार, प्रधानमन्त्रीले गरेको सिफारिस नै राष्ट्रपतिले मान्नुपर्छ । अनि राष्ट्रपति माथिको आक्रोश किन ? यो गणतन्त्र विरुद्धको खेल हो । राष्ट्रपतिको विरोध, गणतान्त्रिक संस्था, गणतान्त्रिक प्रणाली र गणतन्त्रको सर्वोच्च संस्था, गणतन्त्रको प्रतिक हो राष्ट्रपति । गणतान्त्रिक प्रणाली माथिको विरोध हो । राष्ट्रपतिको हुर्मत लिने काम,राष्ट्रपतिको अपमान गर्ने काम, राष्ट्रपति संस्थाको मर्यादा घटाउने काम , आफ्नो पार्टीको भएन वा आफ्नो स्वार्थ अनुसार भएन भने राष्ट्रपतिका संबैधानिक सिमा र काम कर्तव्यहरु त बुझ्न पर्छ होला नि । ”
उहाँले आफुले गरेको निर्णयमा आफु जवाफदेही भएको भन्दै अनावश्यक रुपमा आवेश र उत्तेजनामा नआउन पनि आग्रह गर्नुभयो । उहाँले केही नेताहरुमा आफुले भने जस्तो नभए प्रतिगमन देख्ने प्रवृत्ति हावी भएको टिप्पणी गर्नुभयो ।
उहाँले भन्नुभयो “म जवाफदेही छु प्रधाननमन्त्रीको हैसियतले । मैले गरेको सिफारिस प्रति म जवाफदेही छु । बैकल्पिक सरकारका लागि मार्ग प्रसस्त गरेर सरकार बनाउनु भन्दा कसरी प्रतिगमन भयो ? अहिलेका सरकारका विरोधीहरुलाई एकजुट भएर सरकारलाई विस्थापित गर्ने बाटो खोलिदिएको छ । गर्नुहोस् । भनेजस्तो भएन भने प्रतिगमन देख्नुहुन्छ । ”
उहाँले नेकपा माओवादी केन्द्रका अध्यक्ष पुष्पकमल दाहालप्रति इंगित गर्दे लोकतन्त्र सग पराजित भएकाले आफुलाई लोकतन्त्रको पाठ सिकाएको टिप्पणी गर्नुभयो ।
उहाँले भन्नुभयो “ती मान्छेले लोकतन्त्र सिकाउने ? जो लोकतन्त्रका विरुद्ध लडेर,लोकतन्त्रलाई पराजित गर्न नसकेर, लोकतन्त्रले पराजित गरेपछि लोकतन्त्रलाई आधा मनले स्वीकारेर चलिराखेका छन् तीनै मान्छेले लोकतन्त्र पढाउने ? ”
