एजेन्सी । आर्सनलले इंग्लिस मिडफिल्डर डेक्लान राइसलाई अनुबन्ध गरेको छ । लण्डन क्लबले वेस्ट ह्यामका कप्तान राइसलाई १ सय ५ मिलियन पाउण्डमा क्लबमा भित्र्याएको हो ।
२४ वर्षीय राइसले आर्सनलसँग ५ वर्षका लागि सम्झौता गरेका छन् । जसमा समय थप गर्न सकिने विकल्प समेत समावेश छ ।
उनी सर्वाधिक महँगा इंग्लिस खेलाडी समेत बनेका छन् । यसअघि यतिधेरै मूल्य तिरेर कुनैपनि इंग्लिस खेलाडीलाई क्लबले टिममा भित्र्याएको थिएन ।
वेस्ट ह्यामलाई गत सिजन युरोपा कन्फिरेन्स लिग उपाधि जिताउन महत्वपूर्ण भूमिका खेलेका उनी यस समर ट्रान्सफरमा आर्सनलमा आउने तेस्रो मुख्य खेलाडी हुन् ।
आर्सनलले चेल्सीका जर्मन खेलाडी काइ हाभेट्र्जलाई ६५ मिलियन पाउण्ड र डच डिफेन्डर जुरिन टेम्बरलाई अयाक्सबाट ३८ मिलियन पाउण्डमा अनुबन्धन गरेको छ ।
आर्सनल तेस्रो प्रयासमा राइस अनुबन्धनमा सफल भएको हो । वेस्ट ह्यामले यसअघि दुई पटक आर्सनलको प्रस्ताव अस्विकार गरेको थियो । म्यानचेस्टर सिटीले समेत राइस अनुबन्धनका लागि ९० मिलियन पाउण्डको प्रस्ताव गरेको थियो ।
गत सिजन आर्सनलले दोस्रो स्थानमा रहेर लिग सकाएको थियो ।
