काठमाडौँ । यही असार २५ गते भिस्तारा एयरको उडानमार्फत काठमाडौँबाट भारतको दिल्ली प्रस्थान गर्न लागेका एक अमेरिकी नागरिकलाई अमेरिकी डलर र श्रीलंकन रुपीसहित पक्राउ गरिएको त्रिभुवन अन्तर्राष्ट्रिय विमानस्थलको सुरक्षा निकायले बताएको छ ।
विमानस्थलको प्रस्थान ह्याण्ड ब्यागेज चेकिङ एरियाको चेकजाँच गर्ने क्रममा अमेरिकी नागरिक केभिन विस्ली फिलिप्सलाई ३८ हजार अमेरिकी डलर दुई लाख ६९ हजार ३५० श्रीलंकन रुपी लुकाइछिपाई अवैधरुपमा बाहिरी मुलुकतर्फ लैजान लागेको अवस्थामा फेला पारी पक्राउ गरिएको विमानस्थलको प्रहरीले जनाएको छ ।
त्यसैगरी यही असार २६ गते एयर इन्डियाको उडानद्वारा काठमाडौँबाट भारतको दिल्ली प्रस्थान गर्न लागेका भारतीय नागरिक शिवमकुमार सैनीलाई सोही स्थानमा चेकजाँच गर्ने क्रममा लुकाईछिपाई बाह्य मुलुकतर्फ लैजान लागेको अवस्थामा अमेरिकी डलर ९ हजार सहित पक्राउ गरिएको प्रहरीले जनाएको छ ।
निजहरुलाई आवश्यक अनुसन्धान एवं कानूनी कारबाहीका लागि राजश्व अनुसन्धान विभाग, हरिहरभवन पुल्चोक पठाइएको जनाइएको छ ।
