काठमाडौँ । सत्ता गठबन्धनमा रहे पनि प्रतिनिधिसभामा ६ जना सांसद रहेको जनमत पार्टीले बजेटको विपक्षमा मत हाल्ने भएको छ ।
आज बसेको संसदीय दलको बैठकले बजेट गरिबमारा, मधेसविरोधी र असमान भएको भन्दै बजेटलाई समर्थन नगर्ने निर्णय गरेको पार्टी अध्यक्ष डा सीके राउतले जानकारी दिनुभयो ।
देशकै अर्थतन्त्र धराशायी भइराखेको बेलामा लुटतन्त्रमुखी कार्यकर्ता पोस्न ल्याइएको असमान बजेट कुनै पनि हालतमा स्वीकार्य नहुने उहाँले बताउनुभयो ।
जनमत पार्टी मन्त्री पदकै लोभमा अरू पार्टी जस्तो समर्थन नगर्ने उल्लेख गर्दै अध्यक्ष राउतले भन्नुभयो, “यो संसद्को गरिमाको लागि पनि अपरिहार्य छ । डेढ महिना बजेटमाथि बहस गर्ने तर अन्तिममा आएर त्यही बजेटलाई संशोधनविना समर्थन गरिदिने निरर्थक संसदीय अभ्यास र निरीह संसद्को खिलाफ पनि जनमत पार्टीको यो कदम महत्त्वपूर्ण र ऐतिहासिक छ ।”
बोल्ने बेलामा एउटा अनि लोभलालचमा त्यही जनतामारा बजेटलाई समर्थन गरिदिने परिपाटी र अडान नभएका नेता सांसदले गर्दा देशको यो अवस्थामा आएको उहाँको भनाइ छ ।
