काठमाडौं । नेपाल नागरिक उड्डयन प्राधिकरणले सिम्रिक एयरका सबै उडानमा प्रतिबन्ध लगाएको छ । शुक्रबार संखुवासभाको भोटखोलामा हेलिकप्टर दुर्घटना भएपछि प्राधिकरणले सिम्रिकका सबै उडान स्थगित गरेको हो ।
प्राधिकरणको अनुसार सिम्रिकका अन्य हेलिकप्टरहरूको विस्तृत निरीक्षण, वायु योग्यता र सुरक्षा व्यवस्थापन प्रणालीको लेखा परीक्षणलगायतको लागि उडानमा प्रतिबन्ध लगाइएको हो ।
शुक्रबार दिउसो अरुण तेस्रो जलविद्युत आयोजनाको सामान बोकेर गएको नाइन एन- एजेजेट हेलिकप्टर भोटखोला-४ सिप्रुङमा दुर्घटनामा परेको थियो । दुर्घटनामा परी क्याप्टेन सुरेन्द्र पौडेल, को–पाइलट छिरिङ भोटे, अर्का सहयोगी मनोज थापा र नेपाल विद्युत् प्राधिकरणका कर्मचारी विक्रम शङ्कर गम्भीर घाइते भएका थिए भने स्थानीय भविन गुरुङले ज्यान गुमाएका थिए ।
