काठमाडौं । एसिसी प्रिमियर कपको पहिलो सेमिफाइनल खेलमा भारी वर्षाको कारण खेल रद्द भएसँगै नेपाल फाइनलमा पुगेको छ । कुवेतसँगको खेल नतिजा विहीन बनेपछि नेपाल समूह विजेताको रुपमा फाइनलमा पुगेको हो ।
जितको लागि २ सय ८२ रनको लक्ष्य पछ्याएको कुवेतले ८.३ ओभरमा ६ विकेट गुमाउँदै ३७ रन बनाउँदा वर्षाको कारण खेल रोकिएको थियो । त्यसपछि भारी वर्षा हुँदा सुपर ओभर पनि सम्भव नभएपछि खेललाई रद्द गरिएको हो ।
नेपाल समूह ए को विजेता नेपाल र कुवेत समूह बी को उपविजेता भई सेमिफाइनल खेलेका थिए । खेल हुन नसकेपछि समूह विजेता नेपाल सिँधै फाइनलमा पुगेको हो ।
कुवेतका ओपनर आदनान इद्रिस शून्य, रविजा सनदरुवान ९, परविन्दर कुमार १, मित भावसार ५ र मोहम्मद अस्लाम १४ रनमा आउट भए ।
नेपालका करण केसीले ४.३ ओभरमा १ मेडनसहित १० रन खर्चेर ५ विकेट लिए । सोमपाल कामीले २ ओभरमा १५ रन खर्चेर १ विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको नेपालले निर्धारित ४२ ओभरमा ९ विकेट गुमाउँदै २ सय ८१ रन बनाएको थियो । निरन्तर वर्षाले खेललाई प्रभावित गरेपछि ४२ ओभरमा घटाइएको थियो ।
नेपालको विशाल योगफलको लागि कप्तान रोहित पौडेलले उनले ९५ बलमा ७ चौका र तीन छक्कको सहयोगमा ९४ रन बनाए । सोमपाल कामि १३ रन बनाएर नटआउट रहे ।
कुशल मल्ल ४४ बलमा ४ चौका र ४ छक्काको सहयोगमा ५७ रन बनाउदै आउट भए । उनी कुवेतका साहिव मोनिदको बलमा आउट हुन पुगे ।
नेपालका ओपनर कुशल भुर्तेल ३९ बलमा ७ चौका र १ छक्कासहित ४३ रनमा आउट भए । उनी स्पिनर आदनान इद्रिसको ११ औं ओभरको पाँचौं बलमा यासिन पटेलबाट क्याच आउट हुन पुगे। यस्तै, अर्का ओपनर आसिफ शेख २८ बलमा १ चौका र ३ छक्कासहित ३१ रनमा क्याच आउट भए । आसिफ र भुर्तेलले ७७ रनको साझेदारी गर्दै नेपाललाई राम्रो सुरुवात दिलाएका थिए ।
आरीफ शेख १९ रन बनाएर रनआउट हुदा भीम सार्की एक रनमा क्याच आउट भए ।
कुवेतका मोहम्मद असलाम र अदनानले समान तीन विकेट लिए । यस्तै, यासिन पटेल र सायन मोनिबले समान एक एक विकेट लिए ।
फाइनल सोमबार हुनेछ । नेपालले युएई र ओमानबीचको विजेता टोलीसँग फाइनल खेल खेल्नेछ । उपाधि जित्ने टोलीले आगमी सेप्टेम्बरमा पाकिस्तानमा हुने एसिया कप खेल्न पाउनेछ ।
