इङलिस प्रिमियर लिगमा पछिल्ला केही वर्षदेखि राम्रो प्रदर्शन गर्न नसकिरहेको म्यान्चेस्टर युनाइटेडले आफ्नो टिमका ९ जना खेलाडीलाई आगामी समर सिजनमा अन्य क्लबलाई बिक्री गर्ने भएको छ ।
युरोपा लिगबाट बिदा भइसकेको म्यान्चेस्टर युनाइटेड इङलिस प्रिमियर लिगमा पनि तेस्रो स्थानमा छ । प्रशिक्षक टेन ह्यागमाथि क्लबको छबि सुधार गर्ने ठूलो चुनौति छ । उनी आफ्ना खेलाडीले क्षमता अनुसारको प्रदर्शन गर्न नसकेकामा चिन्तित पनि छन् ।
कुन खेलाडीले क्लब छाड्दैछन् ?
१. भिक्टर लिन्डेलफः सन् २०१७ देखि क्लबमा आबद्ध भएका डिफेन्डर लिन्डेलफ जर्मनीको बुन्डेसलिगा जाने सम्भावना छ । उनलाई भित्र्याउन धेरैवटा जर्मन क्लबहरु इच्छुक रहेका छन् ।
भिक्टर लिन्डेलफ
२. डोन्नी भान डी बिकः म्यान्यूमा आबद्ध भए पनि मिडफिल्डर बिकले क्लबका तर्फबाट खेल्ने अवसर पाएका छैनन् ।
डोन्नी भान डी बिक
३. एन्थोनी एलान्गाः क्लबका युवा स्ट्राइकर एलान्गाले यस सिजनमा क्लबका लागि एक गोल पनि गर्न सकेका छैनन् । उनलाई क्लबले अर्को सिजनमा ऋणमा बिक्री गर्न चाहेको छ ।
४. स्कट म्याक टोमिनीः म्यान्चेस्टर युनाइटेडमै हुर्के बढेका स्कटलाई कसैले राम्रो अफर दिए बिक्री गर्नेछ । उनलाई टिममा ल्याउन अरु धेरै क्लबले रुचि देखाइसकेका छन् ।
५. वाउट विघोस्र्टः गत जनवरीमा इङलिस प्रिमियर लिगको अर्को टिम बर्नलीबाट ल्याइएका विघोस्र्ट फेरि आफ्नै क्लब बर्नली फर्कने छन् । उनलाई म्यान्चेस्टरमा राख्ने सम्भावना ज्यादै न्यून छ ।
६. फ्रेडः ब्राजिली फुटबलर फ्रेड पनि क्लबबाट बिदा हुँदैछन् । उनलाई लिन साउदी अरबीया र कतारका क्लबहरुले निकै इच्छा देखाएका छन् ।
७. ह्यारी म्यागुरीः सेभिया विरुद्धको खेलमा एकपछि अर्को गल्ती गरेका ह्यारीमाथि प्रश्न उठेको छ । उनलाई क्लब छाड्न तिब्र दबाब छ । उनी इङल्यान्डमै रहने छन् तर म्यान्चेस्टर युनाइटेडमा नरहने पक्का भइसकेको छ ।
८. मार्सेल साबिजरः म्यान्चेस्टरका मिडफिल्डर मार्सेल क्लबमा नरहने पक्का भइसकेको छ । उनी आफ्नै पुरानो क्लब बायर्न म्युनिख फर्कने छन् ।
९. एन्थोनी मार्सियलः यस वर्ष युनाइटेडका लागि ७ गोल गरेका फ्रान्सेली फर्वार्ड पनि आगामी समर सिजनमा युनाइटेडमा रहने छैनन् । उनी सम्भवतः स्पेनी क्लबमा आबद्ध हुने छन् ।
एजेन्सी
