काठमाडौं । गुण्डा नाइके मिलन गुरुङ अर्थात चक्रे मिलनका सहयोगी गणेशबहादुर बोगटी ‘एके ४७’ हतियारसहित पक्राउ परेका छन् ।
चक्रे मिलन नेपालगञ्ज गएको बेला उनलाई ‘एके ४७’ हतियारसहित स्कर्टिङ गरिएको भिडियो सार्वजनिक भएपछि बोगटीलाई प्रहरीले पक्राउ गरेको हो । बैजनाथ गाउँपालिका, नौबस्ता निवासी बोगटीको साथबाट प्रहरीले घातक हतियारसमेत बरामद गरेको बताइएको छ ।
बोगटीले जिल्ला प्रशासन कार्यालय बाँकेबाट लाइसेन्स लिएको तर उक्त हतियार के प्रयोजनका लागि र कहिले लिएका थिए भन्नेबारे प्रहरीले अनुसन्धान गरिरहेको जनाएको छ ।
नेकपा ९एमाले० मा रहेका चक्रे मिलन युवा संघको महाधिवेशनमा भाग लिन नेपालगञ्ज पुगेको बेला नेपालगञ्जको सिद्धार्थ होटलमा देखिएको बेला बोगटीले चक्रे मिलनलाई हतियारसहित स्कर्टिङ गरेको भिडियो टिकटकमार्फत सार्वजनिक भएको थियो ।
चक्रे मिलन काठमाडौं उपत्यकाको पुरानो गुण्डा नाइके हुन् । २०६२/०६३ को जनआन्दोलनपछि ठमेलमा दीपक मनाङे, महाराजगञ्जमा चक्रे मिलन र चाबहिलमा राजु गोर्खालीको दबदबा थियो ।
दीपक मनाङेमार्फत रेस्टुराँको बाउन्सर हुँदै ठेक्कापट्टामा लागेर गुण्डागर्दीमा छिरेका गणेश लामाको समूहले २०६१ सालमा पानीपोखरीको चुफाङ रेष्टुराँमा चक्रे मिलनको हात छिनाइदिएको थियो । पछिल्लो दशकमा प्रहरीले गुण्डागर्दीमा संलग्नविरुद्ध आक्रामक नीति लिएसँगै उनीहरुले राजनीतिक आड लिन पुगेका थिए ।
मनाङे गण्डकी प्रदेशसभा सदस्य निर्वाचित भएर मन्त्री समेत बनिसकेका छन् । गणेश लामा सत्तारुद्ध नेपाली कांग्रेसमा छन् ।
