चितवन । उपप्रधानमन्त्री एवम् गृहमन्त्री नारायणकाजी श्रेष्ठले आयातित तरकारीको विषादी परीक्षण नगर्ने भनेर मन्त्रिपरिषदले निर्णय नगरेको बताएका छन् ।
प्रेस सेन्टर चितवनले आज आयोजना गरेको पत्रकार सम्मेलनमा बोल्दै उपप्रधानमन्त्री श्रेष्ठले विषादी परीक्षणको विषय विषयगत समितिमा पठाइएको बताएका हुन् । उनले विषादी परीक्षणजस्तो महत्वपूर्ण विषयमा मन्त्रीहरुले मात्र निर्णय गर्न नमिल्ने भनेर विषयगत समितिमा पठाइएको जानकारी दिए ।
उपप्रधानमन्त्री श्रेष्ठले भने, ‘मन्त्रिपरिषद्ले फिर्ता गरेको छैन । मन्त्रिपरिषद्ले त्यो विषय समितिमा पठाएको छ । यस्तो महत्वपूर्ण विषय मन्त्रीहरुले एकछिन आएर ल ठिक छ वा बेठिक छ भन्न मिल्दैन । सम्बन्धित समितिमा पठाउनु आवश्यक थियो । सम्बन्धित समितिले छलफल गरेर टुंगो लगाउँदैछ । त्यो छिटो हुन्छ।’
उपप्रधानमन्त्री श्रेष्ठले सीमा क्षेत्रबाट हुने तरकारी र पोल्ट्रीजन्य पदार्थको अवैध आयात रोक्न सुरक्षा निकायलाई निर्देशन दिइसकेको बताएका छन् । ‘जति हदसम्म अवैध आयातका कारणले गर्दा समस्या भएको छ त्यो पूरै समाधान गरिन्छ । त्यसबारे आवश्यक कडा निर्देशन गइसक्या छ’, उनले भने ।
यस्तै, श्रेष्ठले रास्वपाका सांसद ढाकाकुमार श्रेष्ठले मेडिकल व्यवसायी दुर्गा प्रसाईंसँग दुई करोड रुपैयाँ मागेको भनिएको अडियो प्रकरणबारेमा पनि अनुसन्धान हुने पनि बताएका छन् ।
