काठमाडौँ । संस्कृति, पर्यटन तथा नागरिक उड्डयनमन्त्री सुदन किरातीले नेपाल वायुसेवा निगमका कार्यकारी अध्यक्ष युवराज अधिकारीलाई स्पष्टीकरण सोध्नुभएको छ ।
सह–चालकको अभावमा काठमाडौँ–दुबई–काठमाडौँ उडानमा भएको डिलाइलगायत विषयमा मन्त्री किरातीले स्पष्टीकरण सोध्नुभएको हो । मन्त्रिस्तरीय निर्णयबाट निगम अध्यक्ष अधिकारीलाई आइतबार स्पष्टीकरण पत्र पठाइएको छ ।
सह–चालकको अभावले शनिबार राति दुबई उडानमा ढिलाइ भएको घटना, मलेसिया उडानका लागि अनिवार्य आवश्यक पर्ने फरेन एयर अपरेटर सर्टिफिकेट (एफएओसी) ११ महिनासम्म नवीकरण नगरिनुको कारण दिल्लीमा दुईवटा पन्चर भएको पाङ्ग्रा बेलैमा फेर्न नसकेर २६ घण्टासम्म जहाज ग्राउन्डेड भएको घटनालगायत व्यवस्थापकीय कमजोरीका विषयमा एक साताभित्र जवाफ बुझाउन भनिएको स्पष्टीकरणमा उल्लेख गरिएको बताइएको छ ।
