काठमाडौं । उपराष्ट्रपति पदको उम्मेद्वार रामसहाय प्रसाद यादवले गठबन्धनबाट सर्वसम्मत उम्मेदवार आफू भएको बताएका छन् । जारी मतदान प्रक्रियामा भोट हालेर निस्कने क्रममा सञ्चारकर्मीहरुसँग कुरा गर्दै उनले गठबन्धनका सबै मतदाताले मत दिएर जिताउनेमा विश्वस्त व्यक्त गरे ।
जसपाकोे उम्मेदवार यादवले उपराष्ट्रपतिमा आफू विजयी भए संविधानको रक्षा र राष्ट्रिय एकताको प्रवर्द्धनमा जोड दिने बताए।
‘गठबन्धनको तर्फबाट सर्वसम्मत उम्मेदवार म नै हो । अब हाम्रो पूर्ण विश्वास छ, गठबन्धनका सबै सदस्यहरूले मत दिएर मलाई जिताउनु हुनेछ ।,यादवले भने, संविधानमा राष्ट्रपतिरउपराष्ट्रपतिको काम कारबाहीको बारेमा उल्लेख गरिएको छ । राष्ट्रिय एकताको प्रवर्द्धन र संविधानको रक्षा गर्नेछु ‘ ।
१० दलीय गठबन्धनबाट उपराष्ट्रपतिमा रामसहायसहित जसपाकी प्रमिला यादव र जनमतकी ममता झाले पनि उम्मेदवारी दिएका छन् । प्रमिलाले भने आफ्नो उम्मेदवारी निष्क्रिय पारेको र रामसहायलाई नै समर्थन गर्ने घोषणा गरेकी थिईन। यद्यपी, मतपत्रमा भने उनको नाम पनि छ । लोसपा, जनमत र नाउपाले ममतालाई अघि सारेका छन् ।
