काठमाडौं । ओपनर आसिफ शेख नेपालको लागि ओडिआईमा सर्वाधिक छिटो अर्धशतक प्रहार गर्ने ब्याटर बनेका छन् । आसिफले आइसिसी विश्वकप लिग–२ त्रिकोणात्मक ओडिआई सिरिजमा पिएनजीविरुद्ध २१ बलमा ८ चौका र ३ छक्कासहित ५३ रनमा अविजित रहे ।
आसिफले पिएनजीका चाद सोपरको आठौं ओभरको चौथो बलमा छक्का हान्दै २१ बलमा अर्धधशतक पूरा गरेका थिए । अन्तिम आठौं ओभरको चार बलमा मात्र आसिफले २० रन बटुलेका थिए । उनले यस ओभरमा दुई चौका र दुई छक्का प्रहार गरेका थिए । यसअघिको ओभरसम्म भने आसिफले १७ बलमा ३३ रनमा खेलेका थिए ।
यसअघि नेपालबाट २०१८ मा नेदरल्यान्ड्सविरुद्ध सोमपाल कामीले ३८ बलमा अर्धशतक पूरा गरेका थिए ।
ओडिआईमा विश्व क्रिकेटमा सर्वाधिक छिटो अर्धशतक दक्षिण अफ्रिकाका पूर्व ब्याटर एवि डिभिलिर्यले बनाएका छन् । डिभिलिर्यले २०१५ मा वेस्टइन्डिजविरुद्ध १६ बलमै अर्धशतक पुरा गरेका थिए ।
अन्तर्राष्ट्रिय क्रिकेटमा नेपालबाट सर्वाधिक छिटो अर्धशतक ज्ञानेन्द्र मल्लले बनाएका छन् । उनले २०२० मा मलेसियाविरुद्ध टि२० आईमा २० बलमा अर्धशतक पूरा गरेका थिए । टि२० आईमा भारतीय ब्याटर युवराज सिंहले १२ बलमा नै अर्धशतक पूरा गरेका थिए ।
नेपालको लागि कप्तान रोहित पौडेलले ओडिआईमा ८ अर्धशतक प्रहार गरेका छन् ।यस्तै, ज्ञानेन्द्र मल्लले ७, कुशल भुर्तेल, कुशल मल्ल र आरिफ शेखले ४–४ अर्धशतक प्रहार गरेका छन् । दीपेन्द्रसिंह ऐरीले ३, पारस खड्का र देव खनालले २–२ अर्धशतक प्रहार गरेका छन् ।
