काठमाडौँ । आइसिसी विश्वकप क्रिकेट लिग २ अन्तर्गत त्रिकोणात्मक एकदिवसीय शृङ्खलामा घरेलु टोली नेपालले लगातार तेस्रो जित निकालेको छ ।
शनिबार त्रिवि क्रिकेट मैदानमा सम्पन्न खेलमा नेपालले नामिबियालाई तीन विकेटले पराजित गरेको हो । नेपाललाई जित दिलाउन आशिफ शेखले ८१, ज्ञानेन्द्र मल्लले ६५, कुशल मल्लले ६२ रनको योगदान दिए ।
आशिफले ९८ बलमा ८ चौका र २ छक्का प्रहार गरे । ७४ बल खेलेका ज्ञानेन्द्रले ५ चौका र ३ छक्का प्रहार गर्दा कुशलले ४९ बलमा ६ चौका र ४ छक्का प्रहार गरे । यस्तै, रोहित पौडेलले ४३ बलमा ३९ रनको योगदान दिए ।
त्यसअघि टस हारेर पहिले ब्याटिङमा उत्रिएको नामिबियाले निर्धारित ५० ओभरमा ६ विकेटको क्षतिमा २७४ रन जोड्यो । नामिबियाका लागि जान ग्रिनले ६३ बलमा ७५ रनको अर्धशतकीय ईनिङ खेले । उनले ११ चौका र १ छक्का प्रहार गरे । यस्तै, पीकीं या फ्रान्सले ३९ बलमा ४९ रन बनाए ।
लोहार्ड लौरेन्सले ४१ तथा माईकल भान २२ रनमा आउट हुँदा कार्ल ब्रिकस्टकले २० रन जोडे । कप्तान ग्रेर्हाड इरास्मस र जान निकोलले समान १५/१५ रन बनाए ।
नेपालका सन्दीप लामिछानेले १० ओभरमा ४६ रन खर्चेर ३ विकेट लिए । सन्दीप यसै खेलबाट विश्वकप लिग टूमा सन्दीप लामिछानेले ५० विकेट पूरा गर्न सफल भए । ५० विकेट पूरा गर्ने उनी समग्रमा तेस्रो तथा नेपालका पहिलो खेलाडी हुन् । यस्तै करण केसीको नामा १ विकेट रह्यो ।
जितसँगै नेपालले २७ खेलमा २४ अंक जोडेको छ । नेपाल छैटौं स्थानमा रहेको छ । यस्तै, नामिबिया ३३ खेलमा ३७ अंकसहित तेस्रो स्थानमा रहेको छ ।
