काठमाडौं । राष्ट्रिय क्रिकेट टिमका पूर्व कप्तान पारस खड्काले स्वयम्भूस्थित द एक्सेल्सियर स्कुलले निर्माण गरेको क्रिकेटको बन्द प्रशिक्षण गर्ने मैदान (क्रिकसल)को उद्घाटन गर्नुभएको छ ।
प्रशिक्षण स्थलको उद्घाटन गर्दै पूर्व कप्तान खड्काले क्रिकेट खेलको विकासका लागि आफ्नो संस्था क्रिकेट एक्सिलेन्स सेन्टर र एक्सेल्सियर स्कुल बीच सहकार्य गर्ने घोषणा गर्नुभयो ।
पूर्व कप्तान खड्का सहितका व्यक्तिले क्रिकेट खेलको विकासका लागि केही वर्षदेखि महाराजगन्जमा क्रिकेट एक्सिलेन्स सेन्टर सञ्चालन गरिरहेका छन् ।
उदघाटनका अवसरमा खड्काले भन्नुभयो, हरेक क्षेत्रमा मेहनत आवश्यक पर्छ तर सफलताका लागि ईमान्दारिता र लगनशिलता पनि आवश्यक पर्छ । यस सेन्टरसँग सहकार्य गर्दै हामी राम्रा खेलाडी उत्पादन गर्छौ ।
एक्सेल्सियरका संस्थापक निर्देशक राम बस्नेतले क्रिकेट एक्सिलेन्स सेन्टर र विद्यालयमा निर्माण गरिएको सुविधासम्पन्न प्रशिक्षण स्थलले क्रिकेट विकासमा केही सहयोग पुग्ने बताउनु्भयो ।
