काठमाडौँ । राष्ट्रिय सूचना आयोगले बुधबार प्रधानमन्त्री पुष्पकमल दाहाल प्रचण्डसमक्ष वार्षिक प्रतिवेदन २०७८/०७९ बुझाएको छ । प्रतिवेदनमा आयोगले सार्वजनिक पद धारण गर्दा शपथको व्यहोरामा गोपनीयता शब्द हटाउन सुझाव दिएको छ ।
शासन पद्धतिमा भइरहेको विकास र सुशासनको आवश्यकतालाई ध्यानमा राखी गोपनीयताको शपथ गराउन सान्दर्भिक नहुने प्रतिवेदनमा उल्लेख छ । सार्वजनिक पद ग्रहण गर्नेका लागि शपथमा रहेको गोपनीयता शब्द पूर्णरुपमा हटाउनुपर्ने आयोगको जिकिर छ ।
व्यक्तिहरुले कुनै पनि नियुक्ति वा सार्वजनिक पद धारण गर्दा कार्यभार सम्हाल्नुअघि गोपनीयता कायम गर्ने व्यहोराको शपथ लिने गर्दछन् । तर कानूनमा कुन सूचना गोप्य राख्ने र कुन सार्वजनिक गर्ने भन्ने छुट्टै व्यवस्था छ ।
सार्वजनिक निकायबाट हुने निर्णय पारदर्शी हुँदा र त्यसको जानकारी सेवाग्राहीले सहज ढंगले पाउँदा लोकतन्त्र बलियो हुने भन्दै आयोगले शपथमा गोपनीयता शब्द राख्दा यसले सूचनाको हकलाई कुण्ठित बनाउने बताएको छ ।
