काठमाडौँ । नेपाली कांग्रेसका महामन्त्री एवम् सांसद गगन थापाले सत्ता गठबन्धन धेरै लामो समयसम्म जाने संकेत नदेखिएको बताएका छन् ।
संसद बैठकबाट बाहिरिने क्रममा सञ्चारकर्मीहरुसँग कुरा गर्दै थापाले एमाले अध्यक्ष केपी शर्मा ओलीबाट विगतमा दुईपटक भएको संसद विघटनको विषयले नै सत्ता गठबन्धनमा बेमेल हुने दाबी गरे ।
आजको बैठकमा सम्बोधन गर्ने क्रममा अध्यक्ष ओलीले संसद विघटन सोह्रै आना सही हो भनेर प्रधानमन्त्री पुष्पकमल दाहाललाई अफ्ठ्यारोमा पारेको थापाको भनाई छ ।
थापाले भने ‘संसदभित्र ध्यान दिएर हेरिरहेको छु । ओलीले हालको प्रधानमन्त्रीलाई अफ्ठ्यारोमा पार्नुभयो । संसद विघटन सोह्रै आना सही हो भनिरहँदा प्रचण्ड टेबुल ठोकौँ कि नठोकौँ भनेर अलमलमा पर्नुभयो । यो सामान्य कुरा लागे पनि यही कारणले बेमेल हुन सक्छ ।’ यस्तै, थापाले कांग्रेसले भोलि प्रधानमन्त्रीलाई विश्वासको मतको विपक्षमा मत हाल्ने बताए ।
