जुत्ता उत्पादक संघ नेपालद्वारा आयोजित ‘१६औँ अन्तर्राष्ट्रिय फुटवेयर औद्योगिक प्रदर्शनी’को उद्घाटन समारोहमा उपस्थित भएर यस क्षेत्रसँग सम्बद्ध उद्यमी‚ व्यापारी र उपभोक्ताहरूसँग साक्षात्कार गर्ने अवसर पाएकोमा मलाई खुसी लागेको छ ।
नेपाली औद्योगिक उत्पादनहरूको प्रवर्द्धन हुने यस अवसरलाई सकारात्मक रूपमा लिंदै उद्यमीहरूको आत्मविश्वास उच्च राख्न र प्रतिस्पर्धात्मक क्षमता वृद्धि गर्न नीतिगत पहलका लागि समेत प्रदर्शनीले योगदान गर्ने अपेक्षा मैले लिएको छु ।
यस महत्वपूर्ण कार्यक्रममा आमन्त्रण गर्नुभएकोमा म आयोजकलाई हार्दिक धन्यवाद दिन चाहन्छु र प्रदर्शनीको पूर्ण सफलताको कामना गर्दछु । ‘स्वदेशी उत्पादनमा आत्मनिर्भरता नै समृद्धिको आधार हो’ भन्ने मूल आदर्शलाई यस प्रदर्शनीले अनुसरण गरेको छ ।
यस प्रदर्शनीले नेपालमा उत्पादित जुत्ता‚ चप्पल लगायतका वस्तुहरूलाई उपभोक्ता र विक्रेतासम्म पुर्याउने कार्यमा योगदान गर्नुका साथै नेपाली उत्पादनप्रति विश्वसनियता जगाउन समेत भूमिका खेल्ने आशा व्यक्त गर्दछु ।
घरेलु उद्योगको रूपमा रहेका नेपाली फुटवेयर उद्योगका उत्पादनहरूले स्वदेशी जुत्ता–चप्पल बजारमा ठूलो स्थान ओगट्न सफल भएको र यसले आधा लाखभन्दा बढी जनङ्ख्यालाई रोजगारी प्रदान गरिरहेको कुरा थाहा पाउँदा मलाई अत्यन्त खुसी लागेको छ ।
साथै‚ कतिपय नेपाली ब्राण्डका फुटवेयर उत्पादनहरूले अन्तर्राष्ट्रिय बजारमा समेत लोकप्रियता हासिल गर्न सफल भएको कुरा मलाई जानकारी छ । हाम्रा उत्पादनहरूलाई गुणस्तर सहित ब्राण्डिङ गर्न सकेको खण्डमा नेपाली फुटवेयर उत्पादनका लागि बजार उपलब्ध हुन सक्छ भन्ने यसबाट प्रस्ट हुन आउँछ ।
त्यसैले, बजार विस्तारमा प्राप्त हुने अवसरहरूको खोजी गर्दै त्यस्ता अवसरहरूको सदुपयोग गर्न पनि म यहाँ उपस्थित उद्यमी समुदायसँग आग्रह गर्न चाहन्छु ।
आजको प्रतिस्पर्धी विश्वमा कतिपय अवसरका ढोकाहरू छोटो समयका लागि मात्र उपलब्ध हुन सक्दछन् भने कतिपय अवसरका लागि उत्पादनको विविधीकरण एवम् उपभोक्ताको रूचिमा निरन्तर ध्यान दिनुपर्ने हुन्छ ।
नेपाल सरकार र उद्यमीहरू बीचमा पर्याप्त साझेदारी निर्माण भई नेपाली उत्पादनको बजार विस्तार एवं निर्यात अभिवृद्धिमा ठोस उपलब्धी हासिल गर्नका लागि यो प्रदर्शनी उपयोगी माध्यम हुने मैले विश्वास लिएको छु ।
मुलुकभित्र उपलब्ध स्रोत र साधनको दिगो उपयोग गर्दै स्वाधीन र आत्मनिर्भर राष्ट्रिय अर्थतन्त्र निर्माण गर्न स्वदेशी उत्पादनमा वृद्धि गर्नु अत्यावश्यक छ । नेपाली श्रम‚ सीप र कच्चा पदार्थबाट नेपालमै उत्पादित सामग्रीहरूको निकासी प्रवर्द्धन गर्न सके मात्र हाल मुलुकले व्यहोरिरहेको चुलिँदो व्यापार घाटालाई सन्तुलनमा ल्याउन सकिन्छ । यसका लागि फुटवेयर उत्पादन उद्योगले पनि महत्वपूर्ण भूमिका खेल्न सक्दछ ।
स्वदेशी उत्पादनलाई सहज र सुलभ बनाउनका लागि नेपाल सरकारले ध्यान पुर्याउनु पर्दछ ।
यसका लागि कृषि उत्पादन बढाउने, वन पैदावार र जडिबुटीमा आधारित आयात प्रतिस्थापन गर्ने तथा पर्यटन प्रवर्द्धन र जलविद्युतको स्वदेशी खपतमा जोड दिने नीतिहरू अवलम्बन गर्नु अति आवश्यक छ ।
हामीले नेपालको अर्थ व्यवस्था विकास गर्न योगदान गर्ने तुलनात्मक लाभका क्षेत्रहरू पहिचान गरिसकेका छौं ।
ती क्षेत्रहरूमा लगानी बढाउन सहजीकरण गर्ने, उद्योगमैत्री नीतिहरू अवलम्बन गर्ने, स्वदेशी उद्योगको संरक्षण गरी प्रतिस्पर्धी क्षमता बढाउन सहयोग गर्ने जिम्मेवारी हामी सबैको हुन गएको छ ।
तसर्थ, निजी क्षेत्र र सरकारले आपसमा उच्च स्तरको समझदारी विकास गरी मुलुकको अर्थव्यवस्थालाई बलियो बनाउनका लागि सहकार्य गर्नु अत्यावश्यक भएको छ ।
यसबाट केही वर्षभित्रै नेपालको व्यापार घाटालाई कम गर्दै लैजाने आधारहरू निर्माण हुनुका साथै रोजगारी र उद्यमशीलताका नयाँ अवसरहरू सिर्जना गरी पुँजी र प्रतिभाको पलायन समेत रोक्न सकिन्छ भन्ने मलाई लाग्दछ ।
अर्थव्यवस्थाको सबलीकरणका लागि राष्ट्रका उद्यमी र किसानको मनोबल सधैं उच्च राख्न अति आवश्यक हुन्छ भन्ने पक्षलाई हाम्रा प्राचीन शास्त्रहरूले समेत सधैं सम्झाएका छन् ।
नेपालको एकीकरणका नायक पृथ्वीनारायण शाहले नयाँ सीप सिकेर स्वदेशी उत्पादनमा जोड दिने नीति लिन र व्यापार विस्तार गर्न आफ्ना उपदेशमार्फत दुई शताव्दी अघि नै हामीलाई सम्झाउनु भएको छ ।
आदिकवि भानुभक्त आचार्यको एउटा प्रसिद्ध सन्देश छ( ज्युँदै मर्याको भनी नाउँ कस्कोरु उद्यम बिना बित्तछ काल जसको । अर्थात्, कुनै उद्यम र इलम बिनाको मानिस ज्युँदै मरे समान हुन्छ ।
तपाईं उद्यमीहरूले यसलाई मनन् गर्नुभएको छ र उद्योगमार्फत मुलुकको सेवा गरिरहनुभएको छ । हामीले आफ्नै इतिहासमाथि न्याय गर्न समेत आफ्नो क्षमताको पहिचान र उपयोग गर्नु आवश्यक छ ।
राष्ट्रपति विद्यादेवी भण्डारीले जुत्ता उत्पादक संघ नेपालद्वारा आयोजित ‘१६औँ अन्तर्राष्ट्रिय फुटवेयर औद्योगिक प्रदर्शनी २०७९’ को उद्घाटन समारोहमा गर्नुभएको सम्बोधनबाट
