काठमाडौँ । अर्थमन्त्री एवं नेकपा (माओवादी केन्द्र) का सांसद जनार्दन शर्माले पार्टी अध्यक्ष पुष्पकमल दाहाल प्रचण्डले आगामी सरकारको नेतृत्व गर्ने दाबी गर्नुभएको छ ।
प्रतिनिधिसभाका नवनिर्वाचित सदस्यहरुको सपथ ग्रहणका लागि संघीय संसद् भवन नयाँ बानेश्वर पुग्नुभएका अर्थमन्त्री शर्माले तोकिएकै समयमा गठबन्धनले सरकार बनाउने र त्यसको नेतृत्व प्रचण्डले गर्ने बताउनुभयो । उहाँका अनुसार सरकारको नेतृत्वबारे गठबन्धनमा छलफल भइरहेको छ ।
उहाँले भन्नुभयो, “माधव कमरेड बिरामी भएर अस्पतालमा हुनुहुन्छ, उहाँ डिस्चार्ज भएपछि गठबन्धनको बैठक बसेर निर्धारण हुन्छ, मैले भन्ने हो भने पहिलोपटक प्रचण्ड नै प्रधानमन्त्री हुनुहुन्छ, तर निर्णय भइसकेको छैन ।
” आफूहरुले प्रचण्ड प्रधानमन्त्री हुनुपर्छ भनेर दाबी नगरेको तर गठबन्धन दलमा सल्लाह भएको उहाँको भनाइ थियो । उहाँले राष्ट्रपति राजनीतिक व्यक्तित्व नै हुने बताउनुभयो । उहाँले आगामी राष्ट्रपति रामचन्द्र पौडेल वा माधव नेपालमध्ये एक हुने जानकारी दिनुभयो ।
