काठमाडौं । नेपाली काग्रेसका महामन्त्री एवं संसदीय दलको नेताका प्रत्यासी गगनकुमार थापाले दलको निर्वाचनमा निर्वाचनको पवित्रता र सांसदको गरिमामा खोट लाग्ने काम भएको बताउनुभएको छ ।
निर्वाचन परिणामपछि दलको कार्यालयमा सञ्चारकर्मीहरुसँग कुरा गर्दै थापाले निर्वाचन आचारसंहिता विपरित फोटो खिच्ने कुरा दुःखद भएको र यसले सांसद पदको गरिमा घटाएको टिप्पणी गर्नुभयो ।
उहाँले भन्नुभयो, “निर्वाचनमा जित हार स्वाभाविक हो तर जुन कार्य भयो त्यो स्वाभाविक थिएन, फोटो खिच्ने साथीहरुले कतै प्रमाण पेश गर्न खिच्नु भएको होला त्यो सामाजिक सञ्जालमा सार्वजनिक गर्दा उपयुक्त हुन्छ ।”
थापाले बहुसंख्यक साथीहरु यथास्थितिमा नै दल चलोस् परिवर्वन आवश्यक छैन भन्ने पक्षमा उभिए पनि आफू निरन्तर रुपमा परिवर्तनका लागि लागि रहने बताउनुभयो ।
आफनो उम्मेदवारी परिवर्तन र रुपान्तरणको लागि भएको भन्दै उहाँले भन्नुभयो, “नेता र नेतृत्व बदलियोस्, शैली र भूमिका फेरियोस् भन्ने अपेक्षा मतदाताको थियो त्यो पूरा भएन ।”
थापाले मन्त्री बनेर सरकारमा नजाने समेत बताउनु भएको छ । उहाँले भन्नुभयो ‘सरकारमा अरु साथीहरू जानुहुन्छ । म त फेरि संसदीय दलको नेता हुन कोसिस गर्छु । योभन्दा बाहेक सरकारमा जाने अहिले गर्नु हुन्न, म गर्दिनँ ।’
