काठमाडौँ । नेकपा (एमाले) का पोलिटब्यूरो सदस्य एवं नवनिर्वाचित प्रतिनिधिसभा सदस्य गोकुल बास्कोटाले नेकपा (माओवादी केन्द्र) का अध्यक्ष पुष्पकमल दाहाल र नेकपा (एकीकृत समाजवादी) का अध्यक्ष माधवकुमार नेपाललाई कटाक्ष गर्दै अर्काको खेतमा मलजल गरेर आफ्नो भकारी नभरिने बताउनुभएको छ ।
सामाजिक सञ्जाल फेसबुकमा उहाँले हालै सम्पन्न प्रतिनिधिसभा सदस्य निर्वाचनमा बामपन्थी एकता भंग गरेर गठबन्धनमा गएका ती दुई पार्टीले प्रतिनिधिसभा सदस्य निर्वाचनमा ल्याएको सिटलाई लिएर कटाक्ष गर्नुभएको हो ।
उहाँले नेपालमा बामपन्थी पार्टीहरुमा बाम एकताको स्वर हराउन थालेको भन्दै कही जनमत र केही हर्कतबाट नेपाली कांग्रेस ठूलो भइसकेको बताउनुभयो ।
अघिल्लो निर्वाचनमा बाम गठबन्धनले झण्डै दुई तिहाई सिट ल्याएको अवस्थामा अहिले माओवादी केन्द्र र एकीकृत समाजवादीले कांग्रेससँग गठबन्धन गर्दा ती दुई पार्टीको सिट संख्या घटेको मात्र नभई स्वयं नेकपा ९एमाले० को पनि सिट घटेको छ ।
नेता बास्कोटाले कांग्रेसलाई सहयोग गर्दा आफैँलाई घाटा भएको तर्फ संकेत गर्नुभएको हो । एकीकृत समाजवादी त थ्रेस होल्डसम्म कटाउन नसकेर राष्ट्रिय दलको मान्यता पाउनबाट विमुख भएको छ ।
उहाँले फेसबुकमा लेख्नुभएको छ, “कुनै समय फुटबलमा रोचक मानिएको स्पेनको टिकीटाका स्टायल हराए जस्तै नेपालका बामपन्थी पार्टीहरुमा बाम एकताका स्वर पनि हराउन थाल्या छन। कहीँ जनमत र केही हर्कतबाट कांग्रेस ठूलो भै सक्यो।अर्काको खेतमा मलजल र गोडमेल गर्ने अनि आफ्नो भकारी भरिएन भनेर गुनासो गर्ने गनगने प्रवृत्ति काम छैन।”
