काठमाडौँ । नेकपा (माओवादी केन्द्र) का उपमहासचिव वर्षमान पुन उपचारका लागि आज चीन जाने हुनुभएको छ । नेता पुनलाई वंशाणुगत रुपमा रहेको पुरानै रोग जण्डिले फेरि सताउन थालेपछि फलोअप उपचारका लागि उहाँ चीन जान लाग्नुभएको हो । चीनमा उहाँले सेनजेनस्थित थर्ड पिपुल्स अस्पतालमा उपचार गराउनुहुने जनाइएको छ ।
गत २०७८ मंसिरमा पनि उहाँ सोही अस्पतालमा एक महिना उपचार गरी फर्किनुभएको थियो । आज साँझा ७ बजे इमिरेट्सको उडानबाट दुबई, ग्वान्झाओ हुँदै सेनजेन पुग्ने पुनको सचिवालयले जनाएको छ ।
चीनमा गत वर्ष उपचार गराएर फर्किंदा बिलुरुबिन ९ रहेकामा अहिले फेरि बढेर ३५ पुगेको छ । बिलुरुबिनले जण्डिसको मात्रा निर्धारण गर्दछ । उहाँसँगै पूर्वसभामुख एवं उहाँकी धर्मपत्नी ओनसरी घर्ती र छोरी शीला पनि आजै सेनजेन जान लाग्नुभएको छ ।
उपमहासचिव पुनले चीन जानुअघि माओवादी केन्द्रका अध्यक्ष पुष्पकमल दाहाल प्रचण्ड र प्रधानमन्त्री शेरबहादुर देउवासँग परामर्श गर्नुभएको छ । स्वास्थ्यमा समस्या आएसँगै उहाँ रोल्पामा चुनावी कार्यक्रममा समेत सहभागी हुनसक्नुभएको थिएन । उहाँ मतदान गरेलगत्तै काठमाडौँ फर्केर आराम गरिरहनुभएको छ ।
