हुम्ला । हुम्लाको सर्केगाड गाउँपालिका–३ स्थित देवकोटा आधारभूत विद्यालय उनापानीमा मतदान स्थलमा झडप भएको छ ।
वारेसनामा विवाद हुँदा भएको झडपमा सहायक मतदान अधिकृत प्रेम भण्डारी र सेनाका हुद्दा अर्जुन उपरकोटी घाइते भएका छन् । उनीहरुको टाउकोमा चोट लागेको बताइएको छ ।
स्थिति नियन्त्रणमा लिन प्रहरीले १७ राउन्ड हवाई फायर गरेको छ । त्यहाँ बिहान ९ बजेदेखि मतदान स्थगित भएको छ । प्रहरीले मतपेटिका सुरक्षित रहेको जनाएको छ ।
वारेसनामा विवादका कारण बिहान ८ः३० मा सत्ता गठबन्धनका उम्मेदवार कार्चेना लामा र स्वतन्त्र उम्मेदवार मंगलबहादुर शाहीका कार्यकर्ताबीच झडप भएको थियो । सोही क्रममा सहायक मतदान अधिकृत भण्डारीको टाउँकोमा चोट लागेको हो ।
लगत्तै सर्वदलीय बैठक बसी पुनः मतदान सुरु गर्ने सहमति भएको थियो । तर पुनः एक दर्जन व्यक्तिले मतदान केन्द्रमा ढुंगामुढा गरेपछि तनाव सुरु भएको थियो । त्यसपछि प्रहरी निरीक्षक पुष्पराज रोकायले पेस्तोलबाट एक राउन्ड र थ्री नट थ्री राइफलबाट ७ गरी ८ राउन्ड फायर गरेका थिए ।
