काठमाडौँ । निलम्बित प्रधानन्यायाधीश चोलेन्द्रशम्शेर जबराले आफ्नो बयानमा हस्ताक्षर गर्न मानेका छैनन् । महाअभियोग सिफारिस समितिले लिएको बयानमा हस्ताक्षर गराउने तयारी भएका बेला उनले हस्ताक्षर गर्न नमानेका हुन् ।
अहिले जबरालाई १७४ पृष्ठको बयान पढेर सुनाउने काम भइरहेको छ । सबै बयान पढ्न पाँच घण्टा लाग्ने अनुमान गरिएको छ । अहिले महाअभियोग सिफारिस समितिको बैठक ४५ मिनेटका लागि स्थगित गरिएको छ ।
निलम्बित प्रधानन्यायाधीश जबराले सुरुमा सबै बयान पढेर नसकिने भन्दै अन्तिम एक पृष्ठमा हस्ताक्षर गरिदिने बताएको समिति सदस्य मीन विश्वकर्माले बताउनुभयो । तर हस्ताक्षर गर्ने बेलामा जबराले हस्ताक्षर गर्न नमानेपछि सबै बयान पढेर सुनाउने काम भइरहेको बताइएको छ ।
विश्वकर्माका अनुसार जबराले आफूले बोलेका कुराहरु बयान भएको, झण्डै २०० पृष्ठको बयान घरमा लगेर पढ्न नसक्ने भन्दै अन्तिम एक पृष्ठमा हस्ताक्षर गरिदिने बताएका थिए । तर अन्तिम पृष्ठमा सही गर्ने बेला जबराले हस्ताक्षर गर्न मानेनन् ।
अहिले अद्योपान्त पढेर सुनाएपछि हस्ताक्षर गराउने तयारी भएको समिति सदस्य विश्वकर्माले बताउनुभयो ।
