काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफू र नेपाली कांग्रेसकी नेत्री आरजु राणा देउवाले भारतसँग सहमति गरेको भन्ने चीनलाई समेत भ्रम परेको बताउनुभएको छ ।
पोखरामा शुक्रबार आयोजित एक कार्यक्रममा उहाँले आफू र प्रधानमन्त्री शेरबहादुर देउवा पत्नी आरजुले भारतसँग सहमति गरेको भन्ने विषयमा चिनियाँ अधिकारीहरुले चासो राखेको बताउनुभयो ।
चीनमा गएका नेपालका राजदूतले उहाँलाई चिनियाँ अधिकारीहरुले भारतसँग आफूहरुले बसेर सहमति गरेको भनेको बताएपछि आफूलाई अनौठो लागेको अध्यक्ष प्रचण्डले बताउनुभयो ।
भारतसँग आफूहरुले सहमति गरेको भन्ने कुरा झुटो र निराधार रहेको उहाँको भनाइ थियो । “यति झूटो र निराधार कुराको यति ठूलो प्रचार गरिनुबाट कहीँ न कहीँ प्रतिगमन र प्रतिक्रान्तिकारी शक्तिहरू निकै सक्रिय छन् भन्नेबाहेक अरु केही होइन”, उहाँले भन्नुभयो ।
यस्तो कार्यले आफू र आफ्नो पार्टीलाई बदनाम गर्ने षड्यन्त्र भएको उहाँले बताउनुभयो ।
