काठमाडौँ । नेपाली राष्ट्रिय टोलीका कप्तान सन्दीप लामिछानेको क्रिकेट करिअर जोखिममा परेको छ । एक किशोरीले सन्दीपमाथि जबरजस्ती करणी कसूरमा प्रहरी वृत्त गौशालामा जाहेरी दिएपछि उनको करिअर धरापमा परेको हो ।
जाहेरीमा १७ वर्षीया नाबालिकाले स्याङ्जा आरुचौर गाउँपालिका स्थायी घर भई हाल काठमाडौँ बुढानीलकण्ठ नगरपालिका बस्ने सन्दीपले यही भदौ ५ गते काठमाडौँ र भक्तपुरका विभिन्न स्थानहरुमा लगेर काठमाडौँ ल्याइ रातको अन्दाजी ११ः५५ बजे काठमाडौँ महानगरपालिका–९ स्थित एक होटलको कोठा नं ३०५ मा लगेको उल्लेख छ ।
भदौ ६ गते राति अन्दाजी १२ः२५ बजे पटक–पटक जबर्जस्ती करणी गरेको उजुरीमा भनिएको छ । प्रहरीद्वारा उक्त जाहेरी दरखास्त दर्ता गरी पीडितलाई एकद्वार संकट व्यवस्थापन केन्द्रमा लगेर विस्तृत स्वास्थ्य परीक्षण गराइएको प्रहरीले जनाएको छ ।
सन्दीपमाथि गम्भीर आरोप लागेको हुँदा उनीविरुद्धको मुद्दा किनारा नलागेसम्म उनले नेपाली क्रिकेट टिमको कप्तानीका साथै अन्तर्राष्ट्रिय लिगहरु गुमाउनुपर्ने हुनसक्छ ।
यसैबीच सन्दीपविरुद्ध किटानी जाहेरीपरेपछि नेपाल क्रिकेट संघ (क्यान) को आज बैठक बस्दैछ । उनलाई क्यानले गत वर्ष मंसिरमा नेपाली राष्ट्रिय टिमको कप्तानमा नियुक्त गरेको थियो ।
आरोप प्रमाणित नभएसम्म सन्दीपलाई दोषी ठहर गर्न नसकिने भए पनि बैठकले उनको कप्तानीलाई तत्कालका लागि निलम्बनमा राख्न सक्ने जनाइएको छ । अनुशासनको उल्लंघन गरेको आरोपमा तत्कालीन कप्तान ज्ञानेन्द्र मल्लसहित चार खेलाडीलाई कारवाही गरेपछि क्यानले सन्दीपलाई कप्तानको जिम्मेवारी दिएको थियो ।
केन्यासँगको पाँच वटा टि–२० र तीन वटा एक दिवसीय क्रिकेट खेल्न केन्या पुगेका सन्दीप यतिबेला एक दिवसीय सिरिज छाडेर क्यारेबियन प्रिमियर लिग खेल्न वेस्ट इन्डिज पुगेका थिए ।
उनीविरुद्ध जबरजस्ती करणीको किटानी जाहेरी परेपछि विदेशी लिगहरुमा उनको स्थान पनि गुम्नसक्ने जनाइएको छ । सन्दीप नेपाली क्रिकेट खेलाडी मात्र नभएर अन्तर्राष्ट्रिय ख्यातिप्राप्त क्रिकेटर पनि हुन् । उनले भारतको आइपीएललगायत वेस्ट इन्डिज र अस्ट्रेलियामा विभिन्न लिग खेलिसकेका छन् ।
आरोप प्रमाणित भएमा उनलाई १२ वर्षको जेल सजाय हुनसक्ने बताइएको छ । यस्तो अवस्थामा उनको खेल करिअर नै सकिने अवस्था छ । निर्दोष ठहरिएको खण्डमा पनि मुद्दाको फैसला नआउन्जेल उनले राष्ट्रिय तथा अन्तर्राष्ट्रिय खेलहरु पनि गुमाउनुपर्ने हुनसक्छ ।
