एजेन्सी । फ्रेन्च लिग वान अन्तर्गत पेरिस सेन्ट जर्मेन (पिएसजी)ले सानदार जित निकालेको छ ।
आइतबार राति सम्पन्न खेलमा पिएसजीले लिललाई उसकै मैदानमा ७–१ को फराकिलो गोल अन्तरले पराजित गरेको हो ।
पिएसजीलाई जित दिलाउन किलियन एम्बाप्पेले ह्याट्रिक गरे भने नेयमारले ह्याट्रिक असिस्टसहित दुई गोल गर्दा लियोनल मेसी र हाकिमीले एक–एक गोल गरे । लिलका जोनाथन बाम्बाले एक गोल फर्काए ।
एम्बाप्पेले पहिलो गोल खेल सुरु भएको ८ सेकेन्डमै गरेका थिए । खेल सुरु हुने बितिक्कै एमबाप्पेले गोल गर्न सफल भए । उनले लियोनेल मेसीले मैदानको बिचबाट दिएको लामो पासलाई नियन्त्रणमा राखी चिप गोल गर्न सफल भए ।
लगातार तेस्रो जित निकालेको पिएसजी ९ अंकसहित तालिकाको शीर्षस्थानमा छ । समान खेल खेलेको लिल ४ अंकसहित १२ औं स्थानमा छ ।
