काठमाडौँ । प्रमुख प्रतिपक्षी दल नेकपा (एमाले) ले जनसरोकारका विषयमा आज काठमाडौँमा बृहत् जनप्रदर्शन कार्यक्रम सुरु गरेको छ । जनप्रदर्शन महँगीविरुद्ध भएको हो । मुलुकमा महँगी, भ्रष्टाचार बढेको विरोधमा राजधानीका विभिन्न स्थानबाट र्याली सुरु गरिएको छ ।
जनप्रदर्शन आयोजक कमिटीका कृष्णगोपाल श्रेष्ठका अनुसार जनप्रदर्शन वसन्तपुरमा मिसिएर भित्री सहर प्याफल, नरदेवी, बाङ्गेमूढा, असन, भोटाहिटी हुँदै शान्तिबाटिकामा पुगेर समापन सभामा परिणत हुनेछ । सभालाई महासचिव शंकर पोखरेलले सम्बोधन गर्ने बताइएको छ ।
जनप्रदर्शनमा पार्टीका काठमाडौँ उपत्यकाका भूगोलका तीन जिल्ला, उपत्यका विशेष प्रदेश र त्यसअन्तर्गतका चार जिल्ला, सम्पर्क कमिटी, जनवर्गीय सङ्गठन, सांसदहरू, पार्टीको केन्द्रीय विभागको सहभागिता रहेको छ ।
