काठमाडौँ । सडक विभागले आगामी असार १ गतेदेखि भदौ मसान्तसम्म काठमाडौँभित्र कुनै पनि सडक खन्न स्वीकृति नदिइने बताएको छ ।
विभागअन्तर्गतको संघीय सडक सुपरीवेक्षण तथा अनुगमन कार्यालय काठमाडौँले एक सूचना जारी गरी वर्षायाममा धारा, ढल, बिजुली, टेलिफोन आदि प्रयोजनका लागि सडक खन्दा तत्काल मर्मत सम्भार गरी यथास्थितिमा ल्याउन नसकिने र सडक पनि बिग्रँदै जाने भएकाले कार्यालयले सो अवधिभित्र कार्यालयअन्तर्गतका सडक डिभिजनहरु मातहत रहेका कुनै पनि सडक खन्ने स्वीकृति नदिइने जनाएको हो ।
कार्यालयले कसैले जबर्जस्ती सडक खेनेको पाइएमा सार्वजनिक सडक ऐन, २०३१ अनुसार कडा कारबाही गरिने बताएको छ ।
