काठमाडौँ । काठमाडौँ महानगरपालिकाको नगर कार्यपालिकाको ८ सदस्यका लागि आज मतदान हुँदैछ ।
कूल ४२ सदस्यीय काठमाडौँ महानगरपालिकाको कार्यपालिकामा आज ८ सदस्यका लागि मतदान हुँदैछ । काठमाडौँ महानगर प्रमुख, उपप्रमुख र ३२ वटा वडाका अध्यक्ष कार्यपालिकाका पदेन सदस्य हुनेछन् । काठमाडौं महानगरपालिकाको कार्यपालिका ४२ सदस्यीय हुनेछ ।
आठ कार्यपालिका सदस्यका लागि प्रमुख, उपप्रमुख, वडाध्यक्ष र वडासदस्यगरी कूल १६१ ले मतदान गर्नेछन् । कूल १६१ मध्ये नेपाली कांग्रेसबाट ९३ जना जनप्रतिनिधि निर्वाचित भएका छन् । यस हिसाबले सबै आठ सदस्यमा नेपाली कांग्रेसले जित्ने निश्चित छ ।
यद्यपि स्थानीय तहको निर्वाचनमा कांग्रेस, नेकपा (माओवादी केन्द्र) र नेकपा (एकीकृत समाजवादी) ले तालमेल गरी उम्मेदवारी दिएकाले नगर कार्यपालिकाको सदस्यमा पनि तालमेल गरेर उम्मेदवारी दिएका छन् । माओवादी केन्द्र र एकीकृत समाजवादीलाई एक÷एक सदस्य दिइएको छ भने कांग्रेसले छ सदस्य लिएको छ ।
महानगरपालिकाको १६१ जनप्रतिनिधिमध्ये एकीकृत समाजवादीको पाँच जनप्रतिनिधि रहेका छन् । तालमेल गर्दा सत्ता गठबन्धनको कूल ९८ जनप्रतिनिधि रहने छन् । नेकपा (एमाले) का ६२ र एक जना महानगर प्रमुख बालेन साह स्वतन्त्र हुन् ।
