काठमाडौँ । नेकपा (एमाले) फेरि फुटको संघारमा पुगेको छ । पार्टीको अनुशासन आयोगले स्थायी कमिटी सदस्य घनश्याम भुसालमाथि कारवाहीका लागि प्रक्रिया अगाडि बढाएपछि भुसालले पार्टीबाट विद्रोह गर्ने तयारी गरेका छन् ।
स्थानीय तहमा नराम्ररी क्षति बेहोर्नुपरेपछि भुसालले पार्टीको नेतृत्व गरेका केपी शर्मा ओलीले आत्मालोचनासहित बाम एकताका लागि आह्वान गर्नुपर्ने वा पार्टी अध्यक्षबाट राजीनामा दिनुपर्ने प्रस्ताव तयार गरिसकेको बताइएको छ ।
नेता भुसालले पार्टीको बैठकमा ती दुई विकल्पसहितको प्रस्ताव प्रस्तुत गर्ने सूचना पाएपछि अध्यक्ष ओलीले केशव बडालमार्फत अनुशासनको कारवाही अगाडि बढाएको बताइएको छ ।
कारवाहीस्वरुप सम्भवतः भुसाल पार्टीबाट निष्काशित हुनसक्छन् । उनले त्यसको आकलन गरेर नै पार्टीबाट विद्रोह गर्ने पूर्वतयारी गरेका छन् । उनको साथमा एमालेका ३० जनाभन्दा बढी केन्द्रीय सदस्य रहेको बताइएको छ । योगेश भट्टराईले उनलाई साथ दिने वा नदिने स्पष्ट छैन । यदि भट्टराईले भुसाललाई साथ दिए विद्रोह गर्ने केन्द्रीय सदस्यको संख्या ५० जति पुग्ने जनाइएको छ ।
विगतमा माधव नेपालको साथमा रहेका नेताहरु युवराज ज्ञवाली, अष्टलक्ष्मी शाक्य, गोकर्ण विष्ट, भीम आचार्य, रघु पन्त ओलीको पेलाइमा पर्दै गएकाले उनीहरुले पनि विद्रोहमा भुसाललाई साथ दिने सम्भावना छ । उनीहरुले बाम एकताका लागि ओलीलाई दबाव दिँदै आएका छन् ।
