काठमाडौं । अमेरिकामा आयोजना हुन लागेको आईसीसी विश्वकप लिग–२ क्रिकेट प्रतियोगिता अन्तर्गत त्रिकोणात्मक एक दिवसीय शृंखलाका लागि नेपाली टोलीलाई शनिबार विदाई गरिएको छ ।

नेपाल क्रिकेट संघ (क्यान) ले एक कार्यक्रमको आयोजना गरेर शृंखला भ्रमण गर्न लागको टोलीलाई शनिबार विदाई गरेको हो । नेपाली टिम आज अमेरिका जाँदै छ । टोलीलाई युवा तथा खेलकुदमन्त्री महेश्वर जंग गहतराज, क्यानका अध्यक्ष चतुर बहादुर चन्द लगाएतको टोलीले विदाई गरेको हो । भ्रमण गर्न लागेको टोलीलाई युवा तथा खेलकुदमन्त्री महेश्वरजंग गहतराजले सफलताको शुभकामना दिनु भयो । विदाई कार्यक्रममा बोल्दै नेपाली टोलीका कप्तान सन्दीप लामिछानले तयारी राम्रो भएकाले नतिजा पनि राम्रो आउने विश्वास व्यक्त गर्नु भयो । धेरै खेल खेल्न बाँकी रहेकाले नेपाली टोलीलाई अर्को चरण पुग्नका लागि पनि शृखंला निकै महत्वपूर्ण रहेको बताउनु भयो । कप्तान लामिछानेले ब्याटिङ पक्षमा सुधार भएको र अमेरिका भ्रमणमा ब्याटिङ पक्षले जिताउनेमा आपूm आशवादी रहेको बताउनु भयो ।

‘अमेरिकाको वातावरण हाम्रो जस्तै रहेको छ । केही बढी हिउमिडिटी रहेको छ । हामी त्यसका लागि तयार भइसकेका छौं र टोलीले पनि सोही अनुसार तयारी पनि गरेको छ । टिमको हकमा टोली सन्तुलित टोली छ । हामी सबै पक्षमा तयार छौं । हामी एक दिवसीय मान्यतालाई जोगाउने भन्दा हामीले हाम्रो खेललाई सुखद बनाउने योजनामा हुनेछौं । राम्रो भएको अवस्थामा एक दिवसीय मान्यता अवस्य जोगिनेछ । भ्रमण एक दिवसीय मान्यता मात्र होइन, क्वारिफायर राउन्ड पनि हो । अघिल्लो चरणमा पुग्नका लागि चुनौति हरु छन् र चुनौति सामना गर्न हामी तयार छौं । पछिल्लो समय हाम्रो ब्याटिङ पक्ष सन्तोष जनक थिएन् । यो बीचमा हामीले खेलेको शृंखलामा त्यो पक्षलाई सुधार गरेका छौं, जसले गर्दा खेलाडीको रिदम फिर्ता आएको छ । अमेरिका भ्रमणमा हामीले ब्याटिङबाटै जित आत्मसात गर्छौं,’ कप्तान लामिछानेले भने, ‘१२ वटा मात्र खेल खेलेका छौं । सबैले हाम्रो तालिका हेर्दा तल हरेको लाग्न सक्छ । हामीले अझै २४ खेल खेल्न बाँकी छ । अहिलेको अवस्थामा सबैले उत्तिकै मिहिनेत गरि राख्नु भएको छ । प्रशिक्षकले भनिरहनु भएको छ, एसोसियट राष्ट्रमा यतिको बलियो टोली कुनै पनि छैन । अहिलेको अवस्थामा सुधार आवश्यकता भन्दा पनि हामीलाई मानसिक हिसाबमा सिद्ध गर्नु पर्ने रहेको छ । पहिलो पटक नेपाली टोली अमेरिका भ्रमण शृंखला खेल्नका लागि जाँदै छ । तयारीलाई राम्रोसँग सदुपयोग गरेका छौं । धेरै भन्दा धेरै खेलमा जित निकाल्ने लक्ष्यमा हामी रहेका छौं ।’

पहिलो पटक शृंखलाका लागि नेपाली टोली अमेरिका भ्रमण गर्न लागेको हो । नेपालले अमेरिका भ्रमण गर्दा आयोजक अमेरिका र ओमानसँग त्रिकोणात्मक शृंखला खेल्नेछ । शृंखला पूर्व नेपाली टोली अमेरिकामा त्यहाँका दुई क्लबसँग अभ्यास खेल खेल्ने तालिका समेत रहेको छ । नेपाली टोलीलाई सम्हालेका मुख्य प्रशिक्षक पुबुदु दशानायकेले नेपाली टोली तयारी राम्रो भएको सुखद नतिजा निकाल्नमा आपूm आशावादी रहेको प्रतिक्रिया दिनु भयो ।

‘नेपाल भित्रको अभ्यासमा हामीले तयारी राम्रो गरेका छौं । पछिल्ला ५÷६ साता टोलीले निकै मिहिनेत गरेको छ । यो बीचमा हामीले आपसमा धेरै खेल पनि खेल्यौं । अभ्यास थालनी गर्दा हामीले युवा खेलाडीमा केन्द्रीत रहेर अभ्यास थालेका थियौं । टोलीको प्रदर्शनमा म विश्वस्त पनि छु । यो मिहिनेतले हामीले एक दिवसीय मान्यतालाई गुमाउने छैनौं । अमेरिका भ्रमणलाई सार्थक बनाउँदै हामी तालिका स्थान सुधार गर्न चाहन्छौं । शृंखला टोलीको पक्षमा आउनेमा म आशावादी छु ।’

लिग–२ शृंखला अन्तर्गत नेपालले पहिलो खेल ओमानसँग जुन नौं तारिखमा खेल्नेछ । त्यसपछि जुन ११ मा नेपाली टिमले अमेरिकासँग खेल्नेछ भने जुन १४ मा ओमानसँग दोस्रो खेल खेल्ने तालिका रहेको छ । यस्तै जुन १५ मा अमेरिकासँग दोस्रो खेल्ने छ ।

आईसीसी विश्वकप लिग–२ प्रतिस्पर्धा गरिरहेका ७ टिमले ३६ वटा म्याच खेल्नु पर्छ । अहिलेसम्म ३२ म्याच खेलेको ओमानले १९ खेलमा जित र १ खेलमा बराबरी गर्दा १ खेल भने नतिजा विहीन बनेको थियो । ओमान ४० अंकसहित शीर्ष स्थानमा रहेको छ । यसैगरी स्कटल्याण्ड २४ अंकसहित दोस्रो स्थानमा रहँदा युएई २२ अंकसहित तेस्रो स्थानमा रहेको छ । १२ खेल खेलेको नेपाल अहिले छैटौं स्थानमा छ । पपुवा न्युगिनीले २० खेलमा प्रतिस्पर्धा गर्दा एक मात्र जित निकाल्दै २ अंक जोडेर तालिकाको पुुछारमा छ । अमेरिका पाँचौं स्थानमा छ भने नामिविया चौथो स्थानमा रहेको छ । ७ मध्य शीर्ष ३ मा पर्ने टिमले अर्को वर्ष हुने विश्वकप क्रिकेटको छनोटका लागि स्थान बनाउने छन् ।