ताप्लेजुङ । ताप्लेजुङको एक मात्र नगरपालिका फुङलिङमा गठबन्धनका उम्मेदवार नेपाली कांग्रेसका अमिर मादेन निर्वाचित भएका छन् ।
गठबन्धनका उम्मेदवार मादेनले दुई हजार ३६७ मतको भारी अन्तरले नेकपा एमालेका छत्रपति प्याकुरेललाई हराउँदै विजय भएका हुन् । उनले ६ हजार १७९ मत प्राप्त गरे । उनका प्रत्यासी नेकपा एमालेका छत्रपति प्याकुरेलले तीन हजार ८१२ मत मात्र प्राप्त गरे । २०७४ सालको निर्वाचनमा विजयी बनेका प्याकुरेल फराकिलो मतले पराजित भएका हुन् ।
त्यस्तै, उपमेयर पदमा भने नेकपा एमालेकी भीमादेवी ओझाले चार सय ३३ मतको अन्तरले विजयी बनेकी छन् । उनले चार हजार २७७ मत प्राप्त गरिन् । ओझाका प्रत्यासी गठबन्धनका तर्फबाट नेकपा माओवादीका उम्मेदवार बमबहादुर भट्टराईले तीन हजार ८४४ मत प्राप्त गरे ।
यस्तै नगरपालिकाको ११ वडामध्ये नेकपा एमालेले ३, ४, ७ र ९ वडामा वडाध्यक्ष जितेको छ भने गठबन्धनका तर्फबाट नेपाली कांग्रेसले वडा न.१, ६ र ८ को वडाध्यक्ष जित हात पारेको छ । गठबन्धनकै अर्को दल नेकपा माओवादीले वडा नं. ५, १० र ११ को वडाध्यक्ष जित्दा नेकपा एकीकृत समाजवादी वडा नं. २ मा विजयी बन्यो ।
