धादिङ । धादिङको नीलकण्ठ नगरपालिका वडा नम्बर ६ भोर्लेमा नेपाली कांग्रेस र नेकपा माओवादी केन्द्रका कार्यकर्ताबीच झडप भएका छन् । ती स्थानमा भएका झडपमा परी कैयौँ कार्यकर्ता घाइते भएका बताइएको छ ।
धादिङमा मात्र झडपमा परेर २० जनाभन्दा बढी घाइते भएका छ्न् । झडपमा नेपाली कांग्रेसका वडा अध्यक्ष उम्मेदवार भुपेन्द्र कुमार श्रेष्ठ गम्भीर घाइते छन् । उनको टाउको, दाहिने आँखा, दात लगायत शरीरका विभिन्न ठाउँमा चोट लागेको छ ।
घाइतेहरुको धादिङ अस्पतालमा उपचार भैरहेको छ । यस झडपमा धेरै कांग्रेसका र थोरै मात्र माओवादी कार्यकर्ता घाइते भएका छन् । माओवादी केन्द्रका अनिल श्रेष्ठ र विष्णु राना घाइते भएका छन् ।
नेपाली कांग्रेस र माओवादी केन्द्रका नेता तथा कार्यकर्ता मौन अवधिमा पनि बुधबार राति चुनाव प्रचारप्रसारमा लागेकाले आपसमा झडप भएको हो । त्यस्तै उता रुकुममा पनि यी दुई दलकै कार्यकर्ता बीच झडप भएको छ । झडपमा परेर दुवै दलका कार्यकर्ता घाइते भएका छन् ।
